Esperansa Estudante ba Kampaña Eleitorál EA

DILI, (TATOLI) - Universitáriu sira espera katak kampaña eleitorál ba Eleisaun Antesipada [EA], ne’ebé hahú ohin, to’o eleisaun, atu kontinua la’o iha ambiente ida hakmatek no iha estabilidade, nune’e “festa demokrasia” ne’e la’o ho susesu.

Gilberto Cabral, estudante ida, hateten katak kampaña eleitorál ne’e nu’udar oportunidade atu partidu polítiku sira hato’o sira-nia programa, no povu bele ezerse sira-nia direitu iha périodu eleisaun.

Tanba ne’e, hanesan mós joven husu atu ita hamutuk nafatin kria paz no unidade iha ita-nia rain. “Ha’u hanesan joven ida hato’o ha’u-nia mensajen ba joven hothotu ne’ebé namkari iha Timor laran tomak, mai ita hamutuk kria nafatin paz no estabilidade iha ita-nia munisípiu, suku atu nune’e labele iha dezentendimentu ba kampaña eleitorál” apela estudante Universidade Orientál Timor Lorosa’e [UNITAL], iha Kampus UNITAL, Becora-Díli, ohin.

Estudante ida mós, Sidonia Fernandes mós hato’o nia esperansa katak iha kampaña eleitorál ne’e, joven tenke kria estabilidade tanba joven mak sai pilar importante ba prosesu dezenvolvimentu ba rai ida ne’e.

Nia mós husu ba partidu polítiku sira katak labele aproveita tempu kampaña hodi uza lianguajen ne’ebé la respeitu, maibé uza tempu ne’e ho di’ak atu hato’o programa partidu nian nune’e povu bele hatene programa partidu idaidak nian.

Nune’e mós, Francisca de Jesus, estudante Komunikasaun Sosiál, espera katak kampaña eleitorál iha tinan ida ne’e bele no sei la’o hakmatek.

“Buat hotu sei la’o hakmatek tanba lider no povu hatudu ona sira-nia maturidade, to’o konsege hakat liu ultrapasa impase polítika,” konklui universitáriu ne’e.

Antes ne’e, RENETIL [Resistência Nacional dos Estudantes de Timor-Leste], liuhusi konferénsia imprensa, apela ba lider polítiku, partidu polítiku ho ninia apoiante sira, organizasaun rezisténsia tomak, povu no membru RENETIL hothotu atu kria dame, estabilidade, seguransa, soberania no unidade nasionál.

Inklui, Konferénsia Episkopál Timoroan [CET-sigla iha portugés] fó sai mós karta espiskopál ida, liuhusi departamentu komunikasaun sosiál CET nian, refere mós ba EA, ne’ebé sei hala’o iha maiu ne’e, bainhira kampaña eleitorál remata.

Karta episkopál ne’e asina direta husi Bispu Dioseze Baucau, Dom. Basílio do Nascimento, Bispu Dioseze Díli, Dom. Virgílio do Carmo da Silva no Bispu Dioseze Maliana, Dom. Norberto Amaral.

Jornalista: Rafy Belo | Editór: Manuel Pinto