sábado, 21 de abril de 2018

Ministru Defeza timoroan hakarak investiga saída hosi dokumentu sira

PARTILHAR

Ministru Defeza ho Seguransa timoroan nian hatete, iha loron-sesta, katak husu ona investigasaun ida ba Komisaun Funsaun Públika no ba Polísia Investigasaun Kriminal kona-ba uzu ne'ebé opozisaun halo ba dokumentu sira hosi nia gabinete.

"Ha'u komunika ona kazu ba prezidente hosi Komisaun Funsaun Públika nian, tanba dokumentu sira karik selesiona hosi funsionáriu sira. Informasaun dahuluk ne'ebé maka fó mai ha'u maka ne'e hanesan krimi no bainhira konsege komprova entaun sei hasai hosi funsaun públika", José Somotxo hatete ba Lusa.

"Ha'u husu mós ba Polísia hosi Investigasaun Kriminal hodi hatene sé maka divulga dokumentu sira ne'e", nia hatutan mós.

José Somotxo hatete katak senti "preokupadu" ho divulgasaun hosi dokumentu sira iha pájina Aliansa Mudansa ba Progresu (AMP) iha Facebook, ne'ebé akuza governante uza laloos osan Estadu nian hodi halo kampaña partidáriu, asaun ne'ebé nia nega.

"Halo ona komentáriu oioin kona-ba asaun ne'ebé ha'u laiha preokupasaun ida. Maibé agora akuza ha'u uza osan Estadu nian hodi halo kampaña. Ne'e hanesan bosok. Ha'u halo orden ida serbisu hodi akompaña kampaña nu'udar ministru", nia esplika.

"Ha'u marka prezensa iha asaun balun maibé ha'u la halo komísiu sira tanba ha'u nia kompeténsia sira nu'udar ministru la adekua hodi mosu iha komísiu sira hodi hakilar", nia insisti.

Tuir Aliansa Mudansa ba Progresu (AMP), ne'ebé halibur partidu opozisaun maioria tolu iha Timor-Leste, katak ministru José Somotxo halo pedidu ida hodi uza karreta sira Estadu nian hodi karik halo "vizita traballu sira", maibé partisipa ativu nafatin iha kampaña sira hosi partidu Governu nian, Frente Revolucionária do Timor-Leste Independente (Fretilin).

AMP nia pájina ofisial iha Facebook divulga dokumentu rua ho fotografia ida ne'ebé, konsidera, hatudu katak ministru José Somotxo "uza laloos osan Estadu nian ba atividade partidáriu ida" hodi uza "kortina hosi membru Estadu nian" hodi halo kampaña.

Iha konkretu, AMP refere katak iha ajenda ofisial, ministru iha previzaun halo "observasaun kampaña nian" maibé mosu ho kamizola ida Fretilin nian iha tribuna onra nian iha komísiu ne'ebé partidu halo iha loron-sesta ne'e iha Baucau, sidade daruak timoroan nian.

Dokumentu ida hanesan despaxu ida hosi "movimentu hosi orden pesoal" asina hodi Somotxo nu'udar ministru no nu'udar "viajante" no ne'ebé refere ba "vizita serbisu ida" ba munisípiu hamutuk 12 no mós ba rejiaun administrativu espesial Oecusse-Ambeno entre loron 10 Abril no 10 Maiu, períudu ne'ebé koinside ho kampaña eleitoral.

Dokumentu daruak hanesan "orden serbisu" ida ne'ebé nomeia grupu ida ho elementu na'in 11, inklui xefe gabinete armamentu nian, ajudante ida iha kampu, eskolta sira ho motorista ne'ebé maka sei akompaña ministru.

"Ha'u la hatene karik ema ruma ba ha'u nia gabinete ka iha Ministériu Finansa hodi husu kona-ba destinu hosi pedidu fundu sira nian. Tezouro aprova ona orden serbisu nian. Dokumentu ne'e aprova ona hosi Tezouro hanesan dokumentu ne'ebé maka mosu iha Facebook", nia esplika.

"Ha'u la hatene karik iha rede ruma ne'ebé fó informasaun ba AMP iha Ministériu Defeza ho Seguransa nia laran. Maibé dokumentu ne'e la liu hosi liman barak, liu de'it hosi diretor-jeral no diretor Finansa nian", Somotxo hatutan mós.

Governante insisti katak akuzasaun "laiha sentidu" no uzu hosi karreta sira no seguransa nian hanesan de'it "hodi hala'o knaar sira" nu'udar ministru hodi "akompaña kampaña".

Somotxo ho primeiru-ministru no sekretáriu-jeral Fretilin nian, Mari Alkatiri, hanesan membru úniku sira hosi ezekutivu atual ne'ebé halo parte iha lista hosi kandidatu sira ba deputadu sira ne'ebé maka partidu aprezenta ona ba eleisaun lejislativu antesipadu iha loron 12 Maiu.

Kampaña ba eleisaun loron 12 Maiu hotu iha loron 09 Maiu oinmai.

SAPO TL ho Lusa | Foto Tatoli
PARTILHAR

Author: verified_user

Publicação luso-timorense sem fins lucrativos

0 comentários: