Komandante hosi Forsa Defeza
Timor-Leste nian (F-FDTL), iha loron-tersa ne'e, hatudu esperansa katak nia
"númeru daruak", Filomeno Paixão, bele kaer kargu nu'udar ministru
Defeza hosi Governu konstitusional daualuk iha inísiu fulan-Jullu.
"Ha'u nia visi, nia husu ona
nia reforma, agora lei hatete katak presiza demisaun no buat barak, to'o
Konsellu Superior Defeza nian. Ha'u hanoin katak sei rezolve. Neineik maka ita
sei to'o", Lere Anan Timur hatete ba jornalista sira iha Palásiu
Prezidensial iha Díli, iha loron-tersa ne'e.
Komandante hatete katak kazu hosi
Filomeno Paixão nian iha liu ezijénsia duké membru sira seluk hosi F-FDTL
tanba, iha pasadu, liuona hosi reforma.
Lere Anan Timur informa ona katak
sei halo parte iha delegasaun hosi Prezidente Timor-Leste nian ne'ebé iha
loron-kuarta sei halo vizita Estadu ida ba Indonézia, no sei substitui kargu
interinu, durante nia auzénsia, hosi "númeru daruak", Filomeno
Paixão.
ilomeno Paixão nia naran nomeadu
ba ministru Defeza halo parte hosi lista ne'ebé primeiru-ministru, Taur Matan
Ruak, entrega ona iha semana liubá ba Prezidente Timor-Leste nian, ne'ebé,
hafoin ne'e, la fó pose ba ema na'in 11 hosi lista.
Kazu barak akontese tanba, karik,
dirijente balun iha ligasaun ho kazu sira ne'ebé relasionadu ho Justisa, maibé
Filomeno Paixão laiha ligasaun ruma.
Paixão husu ona nia pasajen ba
reforma - solisitasaun ida ne'ebé simu ona hosi Lere Anan Timur - maibé tenki
halo, tanba Filomeno Paixão nia pozisaun iha hierarkia F-FDTL nian, prosesu ida
ne'ebé demora tebes.
"Lei sira maka komplika. Lei
sira rasik la komplika bainhira ita tuir loloos. Problema maka iha
interpretasaun sira. Ema ida-idak interpreta tuir sira nia hakarak. Ha'u tanba
la domina lei, bainhira ha'u ko'alia kona-ba reforma hanesan ha'u nia direitu
no laiha ema ida maka tenki impede direitu ne'e", Lere Anan Timur hatete.
"Bainhira asumi misaun ida
ka responsabilidade Estadu nian ne'e hanesan oinseluk. Ha'u tenki tuir regra
sira hodi garanti estabilidade institusional", nia hatutan.
Estatutu hosi militar timoroan
sira defini katak "Prezidente Repúblika maka iha kompeténsia hodi nomeia
no demiti, tuir lei, xefe ho visi-Xefe hosi Estadu-Maior Jeneral F-FDTL
nian".
Konstituisaun mós marka
kompeténsia ne'e, maibé hatete katak nomeasaun no demisaun tenki akontese
"ho proposta hosi Governu" no "rona, iha kazu balun, xefe hosi
Estadu-Maior-Jeneral hosi Forsa Armada sira nian".
Filomeno da Paixão de Jesus,
moris iha tinan 1953, halo parte iha Falintil iha tinan 1975, bainhira harii
hela no, ho restaurasaun Independénsia nian nia halo parte iha fileira sira
Forsa Defeza nian.
Kondekora hosi Prezidente
Repúblika tanba serbisu sira ne'ebé fó iha Operasaun Halibur, ne'ebé mosu iha
fulan-Fevereiru tinan 2008 hosi forsa armada sira ho polísia hodi kaer grupu
responsável ba atake hasoru Prezidente José Ramos-Horta ho primeiru-ministru
Xanana Gusmão iha momentu ne'ebá, Filomeno da Paixão de Jesus promove ona ba
koronel iha loron 14 Janeiru 2009, no hafoin ne'e kompleta Kursu Promosaun ba
Ofisial Jeneral sira.
Hahú hosi tinan 2010 maka sai
nu'udar xefe Estadu-Maior F-FDTL nian.
SAPO TL ho Lusa
Sem comentários:
Enviar um comentário