PR Lú Olo Presta Omenájen iha Jardin Eroi Kalibata Jakarta

DILI, (TATOLI) – Prezidente-Repúblika (PR), Francisco Guterres Lú Olo, kinta (28/6) dadér ne’e hala’o vizita ofisiál ba Jardin Eroi Kalibata, Jakarta Súl, Indonézia, hodi presta omenájen ba eroi nasaun ne’ebá nian.

Iha vizita ne’e Xefe Estadu akompaña hosi espoza Cidália Lopez Nobre Guterres nomós governante sira hosi nasaun ne’e (Timor-Leste).

Tuir informasaun ne’ebé Tatoli asesu hosi Mídia Prezidénsia Repúblika dadér ne’e katak hafoin fila hosi vizita ba Jardin Eroi Kalibata, Xefe Estadu ho nia delegasaun sei hala’o enkontru ho Prezidente-Repúblika Indonézia, Joko Widodo (Jokowi), iha Palásiu Prezidensiál Bogor, Rua Ir. H. Juanda Nú. 1, Munisípiu Bogor, Provínsia Java Oeste, Indonézia.

Lider nasaun rua ne’e sei ko’alia kona-ba kooperasaun bilaterál entre rai rua iha soru-mutu refere.

Francisco Guterres Lú Olo ho nia komitiva to’o iha Aeruportu Internasionál Soekarno Hatta, Jakarta, iha tuku 18:20 oras Indonézia nian no simu diretamente hosi Ministru Teknolojia no Ensinu Superiór, Muhammad Nasir no Embaixadór Indonézia ba Timor-Leste inklui Embaixadór Timor-Leste ba Indonézia no konsuladu sira.

Hafoin ne’e, Xefe-Estadu kontinua kedas viazen ba Hotel Sultan Jakarta, Jakarta Sentru, Indonézia, hodi deskansa.

Iha dalan protokolu sira, autoridade Indonézia taka imajen Prezidente-Repúblika TL ho nia espoza hamutuk Prezidente-Repúblika Indonézia ho nia espoza iha baner ho sentidu fó benvindu ba Xefe Estadu timoroan ne’e.

Antes ne’e, iha Aeruportu Internasionál I Gusti Ngurah Rai Denpasar, Bali, Prezidente-Repúblika ho nia delegasaun simu hosi autoridade relevante ho Konsul Jerál Timor-Leste iha Bali.

Jornalista: Xisto Freitas | Editora: Rita Almeida

Imajen: Ministru Teknolojia no Ensinu Superiór, Muhammad Nasir (imajen kotuk), simu Prezidente Timor-Leste, Francisco Guterres Lú Olo, ho nia komitiva iha Aeruportu Internasionál Soekarno Hatta, kuarta lorokraik. Imajen Mídia PR.