DILI, (TATOLI) – Xefe
Bankada Frente Revolusionária Timor-Leste Independente (FRETILIN), Aniceto
Guterres, hateten atu hamenus no hakotu dependénsia ba reseita minarai, aumenta
rikeza, kombate kiak no disigualdade, presiza diversifika ekonomia liuhosi
dezenvolvimentu setór importante hanesan agrikultura.
“Ita tenke konsidera no
privilegia agrikultura nu’udar baze ba dezenvolvimentu ekonómiku no sosiál ba
ita nia rain. Tanba, melloria setór agrikultura mak sei lori rezultadu
seguransa alimentar, redusaun pobreza rurál, mellora produsaun no produtu
komersiál ba indústria no esportasaun”, hatutan liuhosi intervensaun debate
proposta Orsamentu Jerál Estadu (OJE) 2019 iha jeneralidade, ohin.
Tuir bankada Governu atuál loloos
hahú implementa programa ne’ebé trasa ona, hodi kria dezenvolvimentu ho
polítika klaru atu lori sidade ba kampu ho kualidade sidade nian, maibé ezije
liu servisu, efisiénsia, produsaun no produtividade ne’ebé aas mak sai hanesan karakterístika
husi (..) dezenvolvimentu.
Tuir deputadu ne’e presiza tau
prioridade atu aproveita dezenvolve riku soin, rai bokur iha fatin hotu-hotu
hodi prodús tan rikeza, hametin no haburas rai no ekonomia, ho nune’e nia
presiza revee projetu Tasi Mane.
“Propriu Projetu Tasi Mane
presiza revee fali ho objetivu katak projetu ida mais estruturadu no mais
integradu ho setór sira seluk, hanesan agrikultura no turizmu duke
esluzivamente harii de’it indústria petrolífera ho konsiderasaun ba inserteza
no inseguru esplorasaun Greater Sunrise nian”, katak.
Hodi hatutan: “Ita agora iha faze
ida krusiál tebes iha determinasaun “rumu” dezenvolvimentu ekonomia no sosiál
atu alkansa prosperiedade ekonomika ba povu Timor-Leste. Rai Timor-Leste no
Timor oan hotu labele kontinua hateke loos de’it ba Tasi Mane”.
Hatan ba kestaun ne’e, Primeiru
Ministru, Taur Matan Ruak, hateten ba “polos” dezenvolvmentu iha programa
governu kontempla duni, maibé presiza halo planementu di’ak.
“Ita agora haree polos dezenvolvimentu
iha Oekusi, ita tenke halo estudu ida para haree fila fali polos dezenvolvimentu
ne’e oinsá”, dehan.
Tuir Xefe Governu kestaun ne’e
tenke realiza iha programa VIII Governu Konstitusionál no parte Governu
preparadu kria kondisaun para bele akontese, la’os hotu maibé balun tenke
inisia iha tempu oin mai.
Entretantu, proposta OJE 2019
husi VIII Govenu ho montante billiaun $1,827 ne’ebé inklui ona ho impréstimu
milliaun $87, hanesan orsamentu boot liu kompara ho orsamentu anterior, ne’ebé
másimu ezekusaun OJE 2016 ho montante billiaun $1,631.
Dotasaun orsamentál tinan 2019,
ba saláriu no vensimentu milliaun $214,04, bens no servisu milliaun $478,26,
transferénsia públika milliaun $705,11, kapitál menor milliaun $29,40, no
kapitál dezenvolvimentu milliaun $400,17.
Entre osan hirak ne’e, Ministériu
Agrikultura no Peska hetan orsamentu milliaun $14,709.
Jornalista: Julia Chatarina | Editora:
Rita Almeida
Imajen: Xefe Bankada FRETILIN,
Aniceto Guterres. Foto Antonio Goncalves
Sem comentários:
Enviar um comentário