KAZU VICENTE, PRESIZA LEVANTAMENTU IMUNIDADE

DILI – Membru Parlamentu Nasional (PN) husi Komisaun A nebe trata asuntu konsti­tusio­nais, justisa, administrasaun publika, poder lokal e anti korup­saun, Deputadu Arão Noe de Jesus Amaral afirma, tuir Konstituisaun RDTL, tenke iha levantamentu imunidade bainhira membru Governu ka orgaun soberanu ida atu ba hatan ninia kazu iha tribunal.

Deputadu Arão hateten lia hirak nee relasiona ho dekla­rasaun Prezidente Tribunal Rekursu, Gulhermino da Silva nian katak la presiza hasai imu­nidade Prezidente Parla­mentu Nasional, Vicente Guterres hodi ba hatan iha Tribunal. Tanba krimi nebe des­konfia Vicente komete kona-ba partisipasaun ekonomia negosiu nee ho pena prizaun la liu tinan 2. Needuni Vicente bele ba hatan iha tribunal semlevantamentu imunidade.

“Nee sira nia inter­pre­tasaun katak liu ona aplikasaun tinan 2, mas hau hakarak hateten, iha Kons­tituisaun RDTL hateten iha neba nee katak, tenke iha levantamentu imunidade. Tanba nee mak ami hein prosesu sira nee tenke lao tuir saida mak Konstituisaun hateten,kecuali ema hatete dehan fraganta delitu nebe ke nia halo sala kaptura kedas iha fatin nee oin seluk. Mas komu iha prosesu normal hela tuir dalan mak tenke liu husi prosesu pedidu mai iha nee para Parlamentu Nasional foti imunidade depois mak autoriza ba iha Tribunal,” katak Deputadu Arão ba STL iha PN, Dili, Sesta (17/04/2015).

Nia dehan, Parlamentu Nasional seriu duni atu kombate korupsaun iha rai laran, mas tenke lao tuir prosedur, labele tanba seriu be akuzasaun too mai foti buat hotu fo deit ba, ida nee laloos.

“Ami Parlamentu Nasional seriu atu kombate korupsaun iha rai laran, mas ita tenke lao tuir prosedur, labele tanba ita seriu be kuandu akuzasaun too mai ita foti buat hotu fo deit ba, ida nee laloos, tenke lao tuir prosedur nebe iha atu nunee ita hotu-hotu moris iha nasaun ida nebe demok­ratiku,” nia dehan.

Deputadu Arão fo hanoin katak, demokrasia nee tenke bazea ba lei, tanba nee mak tenke tuir ramu legal sira nebe mak iha, seriedade ema iha mas buat hotu-hotu tenke lao tuir nia dalan.

Iha fatin hanesan, Prezidente Bankada PD, Deputada Maria Loudes Bessa hateten, “se ita interpreta lo loos lei, tuir loos la presiza, maibe pratika korente nebe tinan hira nia laran halo mak kazu hotu-hotu nebe mak involve titular ruma sempre Parlamentu hasai imunidade mak ba, nebe pratika halo hanesan nee. Karik bele halo interpertasaun ida ke oin seluk, tanba lei ida-idak interperta ninia maneira”.

Nia haktuir, uluk esplika iha plenaria rasik katak, iha mos falla komunikasaun entre Tribunal ho Parlamentu Nasional, entaun Tribunal haruka surat la ba Prezidente PN, maibe haruka fali ba ema seluk, konfuzaun sira nee hotu mak dalaruma atraza prosesu.

“Hau hanoin tantu Parla­mentu, tantu Prezidente Parlamentu rasik iha vontade atu koopera ho justisa. Hau hein deit katak prosesu nee bele lao ba oin atu ita hotu bele kontribui ba justisa iha rai laran,” haktuir Deputada Maria.

Entretantu Prezidente Ko­misaun Etika, Deputadu Agos­tinho Lay, hateten, iha lei nee kualker membru orgaun sobe­ranu la ba hatan sivil iha tribunal, tenke iha notifikasaun ruma. Notifikasaun mai nee mak ba iha Parlamentu Nasional atu halo levantamentu imunidade ba membru Governu ka membru Parlamentu Nasional tenke notifikasaun nee mai husi Tribunal. Carme Ximenes

Suara Timor Lorosae