KOMANDO “HANITA” HALO DIALOGU HO KOMUNIDADE AFACA

QUELICAI-Komandu Operasaun Konjunta (PNTL no F-FDTL) ho naran sandi “Ha­nita”, hasoru Mauk Moruk ho ninia membru grupu CRM, halo dialogu aberta aprosimasaun ba komunidade Suku Afaça no Samaguia, Postu Admini­s­trativu Quelicai.

Iha biban dialogu nee, Koman­do Hanita husu sira nia apoiu ba operasaun Hanita hodi estabelese situasaun seguransa ba komunidade. Ba sira neebe involve iha grupu CRM, KOK Hanita husu sira entrega-an didiak hodi presta sira nia deklarasaun.

Chefe Suku Afaca, Joaquim Fern­andes esplika, iha tinan 2014, ninia komu­nidade iha ema nain 2 mak involve grupu Mauk Moruk, CRM.

Maibe depois akonte­semento iha Lalulai, nia rasik buka tuir ema nain rua nee. Hetan depois entrega kedas ba KOK iha momentu neba. Liu tiha ida nee, komunidade Suku Afaça laiha ona ema ida tama iha grupu CRPM ou CPD-RDTL,” dehan Joa­quim ba jornalista iha ex Eskol­a Antigo Reino Quelicai, Postu Administrativu Quelicai, Kinta (2/4).

Em geral, aktivi­dade komunidade Afaça, hahu tinan 2010 too agora lao normal. Komunidade ba to’os no natar hanesan babain. I bainhira KOK Hanita halo operasaun ba iha sira nia area, komunidade Afaça la sente trauma. Sira hotu kolabora no fo apoiu ba operasaun Hanita. “Nudar sidadaun, ita hotu tenki apoiu total ba Komando Hanita. Atu nunee ita nia kompaneru da luta senhor Mauk Moruk bele tun mai hodi submete ba justisa,” hatete Joaquim.

Entretantu situasaun segu­ransa iha Suku Namanei, Che­fe Suku Namanei Jose Xime­nes informa, Suku Na­manei komesa hasai sirkular alerta um hosi opera­saun KOK. Antes tuku 9:00 kalan ba leten komu­nidade hotu-hotu tenki hakmatek ona iha ida-idak nia uma hela fatin. Nia rekoinese katak, ninia komu­nidade balu involve grupu Bua-Malus no grupu CPD-RDTL, maibe depois akonte­sementu Lalu­lai, dia 9 Marsu 2014, sira hotu r­eintegra ona. Sira moris hane­san komuni­dade baibain.

Iha biban dialo­gu, Ko­man­­dante PNTL Munisipiu Baucau, Superintendente Justinho Menezes afirma, Komando Hanita halo dialogu refere hodi hatoo informasaun ba komunidade Afaca no Nama­nei sobre objective operasaun konjunta Hanita nomos hakarak esplika klaru sobre situasaun seguransa iha area Municipiu Baucau. Komunidade suku rua nee hatoo katak, situasaun iha suku rua nee lao hanesan babain. La akontese buat ida.

“Hau hatete ba imi katak, ita haree buat ida la akontese. Maibe operasaun nee ami halao tamba sente iha buat ruma mak lao ladiak. Tan nee mak, halo operasaun konjuntu,” esplika Justinho Menezes. Nia husu komu­nidade suku rua atu kon­tribui maka’as ba seguransa nasional. Kontribui hodi esta­biliza seguransa ba nasaun ida nee.

“Nudar nasaun foun, ita hotu presiza esta­bilidade nasional para dezenvolve ita nia nasaun nee ho diak. Kuandu estabilidade nasaun runggu-rangga bebeik, ita sei la goza ita nia ukun an ho diak. Atu halo buat ruma hodi hadia ita nia moris susar tamba situasaun seguransa la seguru,” hatete Justinho Menezes.

Ba komunidade suku rua nee, Menezes hatete, estadu halo operasaun konjuntu tamba situasaun seguransa iha area Municipiu Baucau lao ladiak. Iha aktividade grupu ilegal neebe lakohi kumpri lei neebe ejisti iha nasaun ida nee.

“Hau hakarak hatete ba ita bot sira katak, kuelker asaun neebe aktivista organizasaun neebe estadu konsidera nudar grupu ilegal, halo asaun fiziku hasoru mem­bru instituisaun nasaun hanesan akontese iha Laga no Baguia, estadu konsidera nudar krimi­nozu. Sira nia organi­zasaun la registadu, ilegal,” reforsa Mene­zes.

Segundu Ko­mandante Tati­ka Opera­saun Hanita, Supe­rintendente Assis­tente Polisia, Abrão Quintas dehan tan. Proble­ma neebe akontese iha Baucau, Laga, Suku Lalulai, no Saelari, no Baguia, konsidera nudar asaun krimi ba estadu. Tan nee, nia husu ba komunidade presiza kons­olida hamutuk, hodi haree si­tuas­aun hirak neebe akon­tese.

“Ita lakohi ema ruma manipula fali situasaun hodi kria sofre­mento bebeik ba komunidade. Hau husu ba inan aman sira, kuandu hasoru ita nia maun alin sira neebe hanoin la hanesan, hakarak estra­ga estabilidade nasional, husu ba sira para mai hamutuk hodi dezenvolve ita nia rain,” nia apela. Ekipa STL

STL