DILI: Negosiasaun fronteira marítima entre Timor-Leste no Austrália la’o namanas hela. Maski nune’e, Governu seidauk bele relata rezultadu aprosimasaun ne’e tanba konsidera segredu.
Ministru Estadu Presedénsia Konsellu Ministru, Hermenegildo ‘Agio’ Pereira, hateten, Governu labele esplika detallu Memoradun of Undertending (MoU) ka konteúdu husi karta ne’e ne’e rasik ba públiku.
“MoU ne’e ne’ebé uluk ita nia delegasaun husi Embaixadór Timor-Leste ba Reinu Unidu nu’udar Ajente Prinsipál Joaquim Fonseca mak entrega ba parte Austrália seidauk iha resposta ruma. Agora ita seidauk bele ko’alia konteúdu (MoU) ne’e rasik,” dehan nia iha Palasiu Governu, horisehik.
Agio dehan, ekipa Konsellu Definitiva Ba Delimitasaun Fronteira Marítima Timor-Leste (KDDFM-TL) ne’ebé xefia husi Joaquim Fonseca no Austrália nian lidera husi Sekretáriu Asistente Departamentu Attorney General, Jhon Reid sei deskute hela.
“KDDFM-TL ne’e mak haree hela kestaun ne’e no MNE mak sei fó sai ninia rezultadu bainhira iha ona rezultadu,” katak nia.
Antes ne’e, TL no Austrália konkorda dada kazu ne’e hosi tribunál arbitrajen internasionál Olanda, atu hodi rezolve disputa fronteira tasi liu hosi dalan amigável.
Misaun servisu KDDFM-TL ne’e buka rezolve mós fronteira marítima Timor-Leste ho Indonézia ne’ebé Indonézia rasik hatudu sinál pozitivu no Austrália mak seidauk fó.
Diariu Independente
Sem comentários:
Enviar um comentário