PNTL Prosesu Ona Estranjeru Nain 58 Nebe Tama Ilegal

DILI - Sidadaun estranjeiru nain 58 ho roo 4 neebe hetan kapturasaun hosi Forsa Naval, oras nee tama ona iha Servisu Investigasaun Kriminal (SIK) hodi halo investigasaun.

Tuir Komandante Jeral PNTL Komisariu Julio da Costa Hornay katak, iha semana nee nia laran Forsa Naval sira halo operasaun ba iha tasi no kaer sidadaun Alor nain 58 ho Roo hat, no ema sira nee tama ona iha prosesu investigasaun nia laran.

Ita fo agradese ba iha Forsa naval sira neebe maka kaer ona ema ilegal sira nee, no too agora ita mos seidauk iha akordu ida konaba batas tasi entere Alor ho Timor nian, tan nee sira kuandu tama ilegal tenke kaer duni sira hodi halo prosesu investigasaun, tamba sa maka sira tama ilegal, no ema sira nee mos dukumentus laiha hotu, tan nee parte Imigrasaun maka sei hare ba kestaun nee,” dehan Komandante Jeral PNTL Komisariu Julio ba Jornalista sira, Sesta (28/08/2015) iha Kuartel Jeral PNTL.

Nia informa, prosesu investigasaun nee lao maka foin bele hare oinsa atu deporta fila fali ema sira nee, tamba nee prosesu ba sira nain 58 nee parte imigrasaun maka sei hare sira nia dukumentu.

Iha fatin hanesan xefi interino Operasaun SIK Mozinho Correa hateten, iha loron ida rua ba kotuk Forsa Naval kaptura duni roo hat, maibe too ohin loron seidauk too mai iha investigasaun tan nee seidauk hatene ema sira nee mai atu halo saida. Informasaun kompletu iha STL jornal no STL Web, edisaun Sabado (29/8/2015). Madalena Horta

Suara Timor Lorosae