MANUEL TILMAN: KUIDADU MAUHU TUR IHA KI

Mauhu ne’ebé sai espiaun Governu hodi deskobre segredu servisu jornalismu nian, labele ba tu’ur iha Konsellu Imprensa (KI).

Jurista no Ekonomista Manuel Tilman hatete katak, ema ne’ebé mak merese atu ba tu’ur iha KI ne’e, ema professional husi jornalista duni, la’os ema polítika.

“Parlamentu atu hili mauhu ida (ema polítiku), nia la’os jornalista, maibé mau hu atu ba bis-bisu ba Sekertariu Estadu nia tilun hodi ba bis bisu fali ba Ministru Dr. Agio nia tilun dehan, jornalista sira aban mai intervista lalika fó,”dehan Manuel Tilman ba jornalista sira iha nia kna’ar fatin Hotel Garden Beach Dili, Kinta (27/8).

Nia mós fó hanoin ba jornalista sira katak, buat ne’ebé mak perigu liu iha Konsellu Imprensa ne’e mak, ema husi nain ba media sira ne’e.

“Perigu ne’e iha ne’e, ema husi nain ba media sira ne’e, tanba osan bele manda imi hotu. Konsellu Imprensa ne’e, ita labele tau fali anju ida hodi defende servisu jornalista nian, tenke ema jornalista professional duni, tanba regra mak hanesan ne’e duni,” katak Manuel Tilman.

Tilman dehan, juis ho prokurador persija duni atu tau matan ba servisu jornalista sira nian, maibé la persija atu ba tu’ur fali iha Konsellu Imprensa ne’e, hodi lidera fali jornalista sira. maibé Tilman dehan, se persija duni, bele tau juis ida iha ne’eba, tanba juiz sira hatene regras no lei.

“Ba ha’u di’ak liu ema jornalista professional duni, ne’ebé susesu ona iha media ida, maibé labele tau fali ema ida ne’ebé loke jornal ida ohin, aban taka fali tanba kompetensia ida laiha, no jornal ne’e la folin,”katak Manuel Tilman.

Nia afirma, jornalista independente ne’e, tenke hurlele duni ukun nain sira para sira isin moris, sei jornalista afabor deit ne’e, la’os jornalista, tanba servisu jornalista ne’e, servisu professional no uniku.

Maibé Tilman dehan, jornalista sira mós tenke kumpri regra no lei, liu-liu kona-ba privasidade ema nian ne’e, tenke kuidadu.

Tilman dehan, tuir nia hanoin, ema polítika mós la persija atu ba tu’ur iha Konsellu imprensa ne’e, tenke ema ne’ebé iha duni kuñesementu kona-ba servisu jornalismu nian.

“Ida ne’e para kuandu problema ruma mosu, nia tenke define no presebe. Juis sira ne’e persebe reforma formalidade legal deit, no prokurador mós atu akuza se iha Konsellu Imprensa,”esklarese Tilman.cos

Jornal Nacional