AKADÉMIKU SUJERE HALAKON LEI PENSAUN VITALISIA

Dosente Fakuldade Ekonomia Universidade Dili (UNDIL), Alfredo D. Santos hateten, lei pensaun vitalisia ne’e diak liu halakon tiha deit tamba lei ne’e hanesan parte ida ne’ebe la fo valor ba Orsamentu Jeral Estadu.

“Ha’u hanoin lei pensaun vitalisia ne’e la’os atu redus ou atu hamenus maibe lei pensaun Vitalisia ne’e preiza halakon tamba ne’e hanesan pemborosan ida luar biasa i nunka mai fo valor. Ha’u hanoin buat ida ne’e mak problema ida ne’e durante ne’e ema barak mak koalia no ami nudar ema akadémiku ami hanoin lei pensaun vitalisia ne’e nunka mais fo suporta ne’ebe diak liu halakon, ”dehan Alfredo D. Santos ba JN-Diário iha kampus UNDIL Dili, Kuarta ( 9/9).

Iha parte seluk, Reitor UNPAZ, Lucas da Costa, hateten katak, lei pensaun Vitalisia ne’e diak liu redus tamba Guvernu no deputadus balun idade sei nurak mos hetan ona pensaun vitalisia, ne’e injustisa bo’ot ida iha rai ida ne’e.

“Hau hanoin ne’e la justu, mas pensaun vitalisia ne’e bele fo ba membrus Governu ne’ebe iha idade para hetan duni pensaun tamba bai- bain iha fatin seluk pensaun ne’e ema hetan banhira to’o ona idade 55 ba leten,”dehan nia.

Tamba ne’e, Lucas da Costa husu deputadus Parlamentu Nasional no Governu tenke hadia lei pensaun vitalisia ne’e lalais, se lae gasta deit OJE.Car

Jornal Nacional