Dada kadoras mai TL tama ona faze diskute aspetu politika

DILI - Politika governu Timor-Leste esforsu maka’as oinsa bele dada kadoras mina no gas husi mina matan Greater Sunrise iha tasi laran hodi dezenvolve iha rai maran. Oras ne’e daudaun hakat ona ba faze aspetu politika. “Prosesu dada pipeline mai iha Timor-Leste ne’e prosesu Greater Sunrise nian teknikamente, komersialmente depende ba ita nia prioridade no ita kontinua nafatin defende katak kadoras tenke mai no agora iha fase seluk ne’ebe iha aspetu politika ne’ebe tenke diskute,” dehan Ministru Petroleu no Rekursu Mineral Alfredo Pires ba BT iha Igreja Katedral, sesta (04/09).

Tuir nia katak prosesu dada kadoras mai iha Timor Leste hare ba iha aspetu tekniku no komersialmente laiha problema maibe agora TL tama ona iha politika hodi diskute kona ba asuntu refere. “Teknikamente no komersialmente ami laiha problema  maibe agora ita tama ona iha politika uitoan ne’e tenke fo tempu ba ida ne’e hotu,” hatete nia.

Kona ba reskursu humanu TL nian atu dada kadoras mai iha Timor Leste  nia dehan oras ne’e timoroan laiha problema tanba  TL iha ona rekursu rasik hodi defende  no jere rasik. “Se mak defende kadoras mesak timoroan deit sei bolu mai no hau hare laiha problema boot no problema ida ne’ebe mak ita bele jere,” katak Alfredo. Nia afirma mos katak hakbesik an ona hodi hamutuk ho Governu Timor Leste mak hanesan kompania Woodside, ConocoPhillips, no mos kompania seluk tan hodi partisipa iha prosesu refere.

“Timor Leste mos kolia ona ho sira oinsa mos bele partisipa iha prosesu sira ne’e maibe agora Timor Leste tenke respeita mina fatin rasik no nain iha tiha ona no kona ba kadoras fabrika LNG buat ida ita bele kolia,” afirma nia. Kona ba prosesu ba implementasaun governu sei hare ba iha folin mina atu nune’e bainhira dada kadoras labele hamosu problema iha fase implementasaun.

“Ita tenke toma atensaun didiak no buka akompaña didiak hodi hare prosesu folin ne’e halo nusa no saida mak provoka hela nia atu tun ita tenke komprende. Mesmu ema barak iha mundu matenek mina nian atu dehan folin aban ka bainrua oinsa susar uitoan maibe Timor Leste nia jestaun kria fundu sai hanesan ezemplu hela ba rai barak no sira iha problema hela,” dehan nia. (BT)

Business Timor