Alemaña Kontinua Apoiu TL iha Área Marítima

Kooperasaun Alemanha (Advisory and Traning of the Maritime Related Industries in Timor-Leste), kontinua fó apoiu ba Timor-Leste (TL) iha área marítima.

Projetu marítima hanesan projetu ne’ebé hala’o aktividade barak hanesan treinamentu iha relasaun ho marítimu nian no atividade seluk ne’ebé iha relasaun ho marítima iha Timor-Leste. Projetu ne’e sei ramata iha fulan Juñu tinan 2016.

Objetivu prinsipál hosi atividade ne’e hanesan hala’o visita ba parseiru projetu marítimu nian ne’ebé relevante, no durante ne’e serbisu hamutuk fó kontribui ba projetu kooperasaun marítima Alemanian nian.

Relasiona ho kooperasaun ne’e, reprezentante kooperasaun Alemania, Rodrigo Garcia-Bernal hateten, objetivu hosi workshop ne’e hanesan sira fahe ka fó hanoin ba malu ho parseiru sira no oinsa sira nia presepsaun durante projetu ne’e hala’o, hosi parseiru sira atu ba oin serbisu di’ak liu tan.

“Ami nia parseiru priméiru maka governu, Ministériu Obras Públikas, Transportes no Komunikasaun, Sekretaria Estadu Polítika Formasaun Profesionál no Empregu (SEPFOPE), ne’ebé ami atu hala’o ou implementa projetu ne’e liu hosi ami nia parseiru sira hanesan sentru treinamentu iha Tibar, Aportil no Diresaun Nasionál Transporte Marítima (DNTM). Durante ami nia serbisu ho governu Timor-Leste ho parseiru sira di’ak tebes,” Rodrigo hateten ba Matadalan iha Hotel Timor, Dili (27/01/16).

Iha parte seluk, Diretór Jerál Planeamentu (SEPOFPE), Jacinto Barros Gusmão subliña, atividade ne’e maluk sira hosi Gesellschaft for Internationale Zusammenarbeit (GIZ) serbisu hamutuk ho Timor-Leste atu halo evalusaun jerál ba sira nia projetu no programa sira ne’ebé hala’o durante tinan ida iha Timor-Leste, liu-liu iha área marítima nian.

Jacinto esplika, marítima hanesan seitor  bo’ot ida, iha potensialidade bo’ot ba Timor-Leste, oinsa maka atu dezenvolve. Nia dehan, tanba ita nia tasi luan, sasan tama sai kona tasi maibé ema barak serbisu iha ne’eba i ita mós seidauk regula didiak, no Timor oan barak seidauk involve iha ne’eba maibé Timor oan barak mós hola ona, ró ne’ebé ita iha oinsa maka prepara ita nia ema sira serbisu iha ne’eba no iha portu tenki  halo jeestaun ho di’ak tanba ita haree asidente balu mós mosu iha tinan kotuk.

 “Sira halo evaluasaun ba sira nia programa ida ne’e, atu planu ba projetu tinan lima nian tan to’o 2020, ne’ebé sira ohin atu fó evaluasaun jerál hosi liña ministériais no mós kompaña sira ne’ebé maka serbisu iha área tasi ninian, atu fó hanoin ruma ba sira para projetu tuir mai ne’e atu fokus liu ba iha área saida ninian,” nia esplika.

Nia afirma, sira komesa ona hala’o formasaun iha área marítima ninian, ho SEPOFPE iha Sentru Tibar durante ne’e, ita haruka ona traballador nain sanulu resin nen (16) , balun serbisu iha Nakroma i balun serbisu iha kompaña sira seluk ne’ebé maka iha transporte tasi laran ninian, no nain ha’at (4) maka  GIZ hamutuk ho SEPOFPE  haruka ba tuir formasaun iha Malazia. (Júlia)

Matadalan