Feto Rakut Malu Tanba Mane

Tribunal Munisipiu Dili (TMD) hala’o julgamentu ba kazu ofensas integridade fizika simples ne’ebe involve arguida ES (feto) rakut malu ho vitima LS (feto), tanba hadau malu mane

Bazea ba akuzasaun husi Ministeriu Publiku ne’ebe lee sai husi juis prezidente, katak iha data 10 Agostu tinan 2015 dadersan wainhira atividade universidade la’o hela, arguida ba buka vitima iha eskola no konsege hetan nia.

Iha momentu ne’eba, vitima tuur hamutuk hela ho kolega sira, derepenti arguida dada no kaer vitima nia liman hodi sai ba liur besik estrada mak husu vitima “o mak namora ho AY ga?”, maibe iha altura ne’eba vitima ho honestu hodi hatan “sim”, foin hatan liafuan sim, sein iha justifikasaun arguida rakut vitima nia fuuk  hodi monu ba rai no tebe vitima nia kabun.

Vitima nia kolegas ne’ebe haree akontesementu ida ne’e lasimu, entaun sira ba hafahe tiha no lori vitima ba polisia hodi hato’o keixa.

Hafoin lee akuzasaun hirak ne’e, juis prezidente husu ba arguida atu hili koalia ou nonok, maibe arguida hili koalia hodi dehan, katak vitima hatene katak arguida namora hela ho AY (mane), maibe vitima la liga hodi namora tutan AY.

“Nia hatene katak hau namora ho mane ne’e, maibe nia la pusing nia ba namora fali ho hau nia doben, ne’e mak halo hau nervozu,” arguida deklara iha tribunal, Dili.

Nia mos deklara, katak nia koko ona husu deskulpa ba vitima, maibe to’o agora vitima seidauk perdua nian.

Iha fatin hanesan juis prezidente mos husu ba vitima atu fo nia deklarasaun no iha altura ne’eba vitima mos presta nia deklarasaun, katak nia rekonese sala, tanba namora tutan ho arguida nia doben.

“Ita bele koalia didiak, maibe arguida la halo ida ne’e e hatudu fali attitude ne’ebe la edukadu liu,” vitima LS deklara.

Iha momentu hanesan, vitima konsege aprezenta dokumentus balun rezultadu halo tratamentu iha ospital wainhira hetan torturasaun husi arguida.

Hafoin rona tiha deklarasaun husi arguida no vitima, juis prezidente deside fo pena prizaun fulan neen ba arguida hodi ba oin la repete tan aktu hanesan.

The Dili Weekly