CAC HALAO WORKSHOP HO PARTIDU POLITIKU SIRA

Comição Anti Corupção (CAC), organiza workshop  ne’ebe involve mos  partidu politiku sira hotu ho nia tema “kontribuisaun partidu politiku  ba asegura integridade no soberania Estadu nian, ho nia sub tema, prevensaun korupsaun ba partidu politiku iha kampanha eleitoral no elisaun jeral 2017.

Tuir Adjuntu Komisariu CAC ba Serviso Tecnico Apio Coperação, Manuel C. C. B. Corte Real iha nia intervista ba jornalista sira, iha salaun Esperansa, Delta Comoro, Dili Sesta (24/06), katak   Planu ne’ebe maka  sira trasa tiha ona katak sei halao workshop ho partidu politiku sira iha tinan 2016 ne’e laos dala ida maibe  sei dala rua ka tolu ho partidu politiku sira, liu liu papel CAC nian, no  konvida mos husi  Comição Função Publika (CFP)  hodi bele hato’o sira nia papel tanba maioria funsionariu publiku barak mak sai hanesan simpatezantes no balun mos sai hanesan militantes partidu politiku sira tanba  ne’e importante konvida, maibe haree katak partidu lubuk ida mak la marka prezensa iha ne’e la hatene razaun  saida, tanba, husi CAC fo ona konvite antes semana ida tiha ona no konfirmadu sira hotu sei partisipa, hodi esplika   papel CAC nune’e CFP ho PDHJ ninian ba sira.

“ Objektivu husi  workshop ne’e para ami fo hanoin fali ba sira katak  partidu politiku sira nudar instrumentu ida ne’ebe importante tebe-tebes  ba  Gorvernasaun diak, katak sira mak hetan lizitimadade para depois kuandu iha kampanha sira manan sira mak sei tur iha parlamentu nasional, kaer  Governu, tanba ne’e maka ami hakarak fo hanoin ba sira buat ida akontese sai preokupasaun ema hotu hotu nian ne’e maka korupsaun,  tanba ne’e fo hanoin  ba kaer ukun iha tinan 2017, para sira bele sai hanesan ema sira ka entidade lae ba  korupsaun,” hatete  Adjuntu komisariu CAC ne’e.

“Tanba lideransa ne’ebe iha hanoin diak atu kombate korupsaun, buat korupsaun ne’e fasil tebe tebes ba ita atu kombate, tanba ne’e mai sei halibur entidades partidu politika sira hodi fortifika nafatin sira nia hanoin katak buat ida kombate korupsaun ne’e diak tebe tebes,” Manuel hatete.

Iha oportunidade ne’e , Prezidente Partidu Dezenvolvimentu Nasional (PDN), Fernando Gusmão, hatete sira nia  presfektiva katak, seminariu ida ohin importante tebe-tebes, tanba partidu politika sira bele fo kontribuisaun no mos halo asaun, oinsa maka bele  prevene korupsaun ne’e labele mosu.

“Tanba ne’e mak ohin ami mos mai partisipa no  konserteza orseda ami mos sei fo ami  nia hanoin / Maibe triste ida maka partidu sira iha poder atu desidi, liu-liu partidu sira ne’ebe iha reprezentasaun bo’ot iha Parlamentu Nasional  sira  la marka prezensa, tanba atu muda lei halo lei foun ne’e depende ba sira, korupsaun ne’e atu mosu ka la mosu sira nia ema maka tur hotu iha Ministru no deputadu sira iha PN ne’eba, ida ne’e maka ami hanesan triste uitoan katak  envora CAC iha inisiativa ne’ebe diak tebe-tebes, mais la hetan apoiu husi nai ulun sira ne’ebe maka ukun dadauk nasaun ne’e oinsa  atu kombate korupsaun,  mais PDN  nia pozisaun suporta nafatin  serbisu atu kombate korupsaun tanba konsidera krimi ida extra ordinariu tanba ita hotu hotu tenki tau matan, buka  meuis  oinsa maka halakon korupsaun iha ita nia rain,” Prezidente PDN ne’e hatete.

 Tuir observasaun husi Jornalista nian ba iha workshop ne’ebe organiza husi  CAC   partisipa husi partidu politiku sira ne’e, iha  fatin refere, maioria partidu ne’ebe  partidu ne’ebe partisipa ne’e so partidu ki’ik no foun sira deit ho partidu FRENTI MUDANÇA maka partisipa, PD FRETILIN ho CNRT la marka prezensa iha seminariu ne’e. partidu sira ne’eb marka prezensa mak hanesan, KHUNTO, ASDT, BUP,  PDP,  PUDD ho partidu ki’ik seluk tan. Des

Jornal Nacional