ESTADU SEIDAUK REKONHESE EIS DADUR 1975

Eis dadur  politika Timor-Leste iha tempu okupasaun Indonesia nian  iha tinan 1975,  konsidera to’o agora Governu Estadu  ida seidauk rekonhese sira no fo estatutu ruma ba sira.

“Ohin ami hasoru malu hanesan inkontru nostalgia ka memoria ida,  ami kolia mos situasaun hanesan prizioneriu politiku mosu iha Timor, Primeiru prizioneriu,  Indonesia kaer maka ami,  maibe ami senti to’o ohin Estadu seidauk rekonhese ami nia estatutu hanesan antigus primeiru prizionerius. Selae sira haksoit liu tiha husi istoria, katak ami ne’e mos dadur bapak  kaer tanba ami nia luta atu ba independensia tanba ne’e  ami husu deit atu sira bele rekonhese hodi hetan diretus estatutus hanesan antigus prizioneirus,  tanba iha maluk barak seidauk hetan estatutu hanesan primeiru prizioneirus politika iha Timor-Leste,” hatete reprezenta eis prizioneirus primeiru politika iha Timor-Leste, Germanu Antonio de Jesus, wainhira halao sorumutu  entre sira iha, Audian, Dili, Tersa (21/06), kalan.

Germanu hatutan, hanesan ema hotu hatene katak iha tempu ne’eba, iha invasaun Indonesia tama mai Timor-Leste, kuandu iha invasaun  sempre iha prizioneriu,  sira hamutuk iha prizaun Balide, Bapak  kaer sira  tanba  sira UNTIM, primeiru  estudante universitariu ne’ebe organiza atu haree ba ukun ne’e, ne’ebe halo bo’ot FRETILIN mas ohin sira nia estatutu ne’e seidauk los tanba, husi FRETILIN fo tiha ona sertifikadu mas ida ne’e la to’o.  Mas sira mos rekonhese tanba to’o oras ne’e ulun bo’ot sira seidauk bele hakerek FRETILIN nia  istoria, se koalia FRETILIN automatikamente UNTIM tenki koalia tanba organizasaun ida ne’e maka halo bo’ot FRETILIN.

“Ami la ezizi  buat barak husi Governu, ami la presiza osan, aumenus ke Governu rekonhese fo estatutu lolos ba ami tanba ami ho sira seluk ikus ne’e la dun hanesan,  ami ne’e FRETILIN tuda liman tuda fatuk sei liman, sira agora ne’e lae momentu ne’e tuda fatuk subar liman, ami hatudu oin.  Ami mak FRETILIN, momentu ne’e ami hamutuk tanba FRETILIN movimentu ne’ebe mak ami defende maibe to’o tiha independensia  estatutu FRETILIN nian hanesan movimentu ne’e devia hotu iha hakerek lei inan ne’e, nia produtu FRETILIN nudar FRETILIN movimentu, haree ba ami nia estatutu nudar prezu politiku, Governu haluha, hotu-hotu  la haree, hanoin ami ne’e hanesan hotu sira seluk, ida ne’e labele hanesanm,” hatete eis dadur primeiru politika TL iha tinan 1975  ne’e.

“Ami maka primeiru,  sira ikus depois asesu buat hotu ne’e, depois jornalista tama tiha ona Timor ona, ami la ba ezize ida ne’ ba Governu, Governu maka tenki buka se mak dadur politiku primeiru iha Timor-Leste hodi konhese, agora lori supermi maka nai estatutu sai uluk tiha, ami sira ne’e to’o agora estatutu seidauk iha. Uluk ami terus hamutuk iha prizaun laran,  pelumenus ohin tur hamutuk  konta istoria hamnasa ba malu, maibe ida ne’e la to’o,  ami hakarak hatudu ba Governu ida ne’e katak ami maka primeiru prizioneiru ne’be estatutu seidauk los,” Nia hatete.

Iha fatin hanesan  sira nia grupu antigus primeiru prizioneiru  politiku iha 1975 Indonesia sira kaer,sira  hela tinan ba tinan iha Prizaun Balide, sem hetan apoiu husi kualker organizasaun ka ONG ruma, sira durante tinan hirak ne’e,

“Se iha ema seluk hetan diretus hanesan veteranus, hau senti ke ami nia maluk sira ne’ebe iha ne’e, sira estatutu hanesan primeiru antigus prizioneirus politiku, sira mos iha diretus atu hetan rekonhesementu husi Estadu ida ne’e,” hatete Bernado Rigoberto Carvalho.

Iha oportunidade ne’e mos,  dadur feto primieru politika iha tinan 1975, Maria da Silva ka naran bolu Maria Benfica hatee,  iha tempu ne’eba nia mos bapak Indonesia sira kaer ba dadur hotu iha prizaun Balide 1975, durante fulan nen (6) nia laran tanba  apoiu hahan ba maluk sira iha ailaran, ho ida ne’e bapak kaer sira hodi halo torturasaun oi-oin no mos halo violasaun seksual ba dadur feto maluk sira seluk.

“haree situasaun sira ne’e,  ami sempre ezize ba Estadu reklama hela diretus husi ami vitima  ne’ebe hetan torturasaun no violasaun seksual sira ne’e , ami ba hasoru to’o hia Parlamentu Nasional,  to’o agora seidauk hetan buat ruma husi Governu, maske nune’e mai ami kontenti nafatin tanba ami nia sofrementu sira ne’e hotu,  to’o ikus manan duni  independensia ida ne’e. Des

Jornal Nacional