OKUPA RAI TO’O TINAN 20 IHA DIREITU HETAN TITULU PROPRIEDADE PRIVADU

Vise  Prezidente  komisaun  A-PN, Deputadu  Arão  Noe esplika konaba lei rai katak, sidadaun ne’ebé  okupa rai to’o  tinan  20  ba  leten  nia  iha  direitu   hetan  titulu  propriedade  privadu, kuandu laiha reklamasaun husi igreja ka ema seluk.

“Hau  hanoin  sé  aprova  duni  lei  ne’e no  hetan  promulgasaun, sira  ne’ebé  iha  titulu  Portugal  nian ka  Indonesia  nian  ou  nia  okupa  hodi  uza  rai  ne’e  iha tinan 20  ba  leten,  nia  iha  direitu  hetan  titulu ba rai,”dehan Deputadu  Arão  Noe ba JN-Diário  iha Parlamentu Nasional (PN),  Kinta  (23/6).

Vise  Prezidente  komisaun  A  ne’ebé  trata  ba  asuntu  konstituisaun, justisa, administrasaun públiku, poder loka no  anti  korupsaun  ne’e afirma, koalia  konaba  titulu  ba  rai  ida-idak, labele  iha  konkordansia  iha  1940  rai  ne’ebé  igreja  okupa  iha  Timor  ne’e  laiha  titulu  hotu, tamba  ne’e  tenki  hare  kazu  por  kazu  no  lei  koalia  asuntu  por  asuntu  la  trata  enjeral.

Iha audensia ho amo  lulik,  sira mos koalia konaba problema  rai katak, iha rai balun uluk sarani sira fo ba igreja, maibe agora sira reklama fali ona. Ho kazu refere hatudu  katak, rai  sira  ne’ebé  mak  igreja  sira  uza  ne’e  iha  problema.

Deputadu  husi  bankada  CNRT  ne’e  hatutan  katak, laos  rai  misaun  hotu-hotu  laiha  titularidade, maibé  iha  rai  balun  iha  kapela  no  suku  inklui  estasaun  misionaria  barak liu  surat  laiha. Tamba  iha  mak  rai  ne’ebé  komunidade  ne’ebé  mak  fó  ba  igreza  uza  durante  iha  tempu  naruk  nune’e  tenki  hela  klaru, atu  labele  zeneraliza katak, rai  ne’e  hotu-hotu  laiha  titulu,maibé  iha  parte  balun  iha  duni  surat  no  mós  balun  laiha.

Nia hatutan, laos rai  igreja  paroquia, diocese laiha  surat  ou  titulu, maibé kuaze igreja paroquia iha  foho  liu-liu  munisipiu, postu dministrativu no  sukus  sira  ne’e  barak  liu  mak  laiha  surat. Ho rai igreja  nian  ne’ebé  seidauk  iha  titulu,  públiku  labele  intrepeta  katak, rai  igreja  nian  laiha  hotu  surat, afinal  balun  iha  no  balun  mak  laiha.

“Hau  dehan  bele  balun  iha  titulu no  balun  laiha  ba  hau  fiar, tamba  hau  mós  sarani  no  molok  sai  deputadu  iha  Parlamentu  hau  mós  servisu  iha  paroquia  Fatuberliu no  hau  koñese  estasaun  misionariu  sira  iha  ne’eba  ne’e  iha  surat  ou  laiha  hau  hatene,”tenik nia.Tos

Jornal Nacional