LEI PARPOL HARUKA HIKAS BA PR, PN LA MUDA VIRGULA IDA

Lei Partidu Polítiku (parpol), ne’ebé foin lalais Prezidenti Repúblika veta, Parlamentu Nasionál (PN), halo tiha ona konfirmasaun votus ba lei refere, maibé deputadu sira lamuda pontu ka virgula ida husi lei ne’e.

Prezidenti Parlamentu Nasionál (PN), Aderito Hugo da Costa informa katak, lei partidu polítiku ne’e, PN halo tiha ona konfirmasaun, i haruka fila ona ba Prezidenti Repúblika atu  ejerse nia kompeténsia.

“Konfirmasaun de votus signifika, la muda pontu ida ka virgula ida, sé reapresiasaun, ne’e bele muda, maibé konfirmasaun de votus, la presiza muda, presiza de’it mak rekezitus,” dehan Aderito Hugo ba jornalista sira iha Hotel Timor Dili, Kuarta (01/06).

Aderito haktuir, iha tempu badak Prezidenti Repúblika, Taur Matan Ruak bele promulga ona lei ne’e.

Nia esplika, bainhira Prezidenti Repúblika veta lei ne’e hodi haruka fali ba PN, deputadu sira halo kedas votu de konfirmasaun.

Aderito esklarese, PN halo tiha ona konfirmasaun de votus iha semana kotuk, tanba lei ne’e la presiza atu muda buat ida.

Nia hatutan, Prezidenti Repúblika nia tempu iha loron walu (8) atu halo promulgasaun ba ida ne’e tuir konstituisaun RDTL.

Antes ne’e Prezidenti Repúblika (PR), Taur Matan Ruak veta tiha lei Parpol ne’e, tanba tuir PR Taur Matan Ruak katak, lei ne’e la kondis ho realidade Timor Leste nian agora.cos

Jornal Nacional