TL Sei Komemora Tinan XX Nobel da Paz

DILI- Timor Leste (TL) sei komemora tinan XX Nobel da Paz, tamba iha tinan 1996 Timor oan Nain rua Jose Ramos Horta ho Bispu Dom Carlos Felipe Ximenes Belo, SDB, simu Nobel da Paz nee ba povu TL no azuda loke odamatan iha mundu ba luta diplomatiku, hodi tane aas luta klandestina no luta armadas iha TL too hetan indepedensia.

Lia hirak nee hatoo husi Premiadu Nobel da Paz Jose Ramos Horta, hafoin remata enkontru ho Prezidente Partidu Fretilin, Francisco Guterres Lu-Olo, iha CCF, Comoro, Dili, Kinta (02/06/2016).

Ami hasoru Lu-Olo nudar Prezidente Fretilin, para esplika inisiativa neebe Primeira Dama hamutuk ho hau halo iha fulan Otobru mai nee, ita selebra tinan XX, simu Premiu Nobel da Paz. Iha 1996 komite Nobel da Paz fo premiu ba Timor oan nain rua hanesan Amu Bispu Belo ho hau rasik, maibe fo nee ba povu TL e Premiu Novel da Paz nee mos azuda loke odamatan iha mundu, ba ita nia luta diplomatiku, neebe tane luta klandestina no luta armada iha Timor,” hateten Horta.

Eis Prezidente nee mos hatutan tan katak Premiu Nobel barak ona konvida, laos Premiu Nobel da Paz deit, maibe sira nia hanoin konvida mos Premiu Nobel iha area sensia, medesina no ekonomia para sira mai aproveta halo konfrensia ho akademika no estudante sira.

Iha fatin hanesan Prezidente Partidu Fretilin Francisco Guterres Lu-Olo hateten Fretilin sei apoiu konaba komemorasaun tinan XX ba Nobel da Paz. Informasaun kompletu iha STL Jornal no STL Web, edisaun Sesta (3/6/2016). Joao Anibal

Suara Timor Lorosae