MIGRASAUN KAPTURA SIDADAUN INDONESIA 12

Servisu Migrasaun halo operasaun konsege kaptura sidadaun Indonesia na’in 12 ne’ebe maka hala’o servisu professional nian iha kompañia maibe uza vistu turista.

Migrasaun kaptura sidadaun Indonesia 12 iha semana kotuk na’in 7 nebe kaptura iha parte Audian, na’in 5 kaptura iha Delta. Maibe dadaun ne’e  sira sei fila ba sira nia fatin ida-idak nian hodi hein prosesu kontinuasaun.

“Ita lori ona sira na’in 12 ne’e mai iha ne’e hodi halao investigasaun atu nune’e bele hatene sira viola iha artigu hira depois ita foti medidas,”afirma Komandante Sektor Operasaun Migrasaun Inspektur Assistenti Polisia, Vicente Gusmão, ba Jornalista iha nia knar fatin, Vila-Verde, Dili, Kuarta (26/10/2016).

Kompañia ne’ebe fo servisu ba sidadaun Indonesia nia hatete, parte servisu migrasaun mos bolu hodi hala’o investigasaun husi investigasaun ne’e mak viola artigu ruma kompañia mos sei simu ninia konsekuensia tuir lei.

“Ita mós bolu hotu kompania ne’ebe maka hatama sidadaun Indonesia sira ne’e mai servisu iha ita nia rai, karik investiga maka viola artigu ruma, sira tenki simu konsiekonsia,”afirma Vicente Gusmão.

Konaba informasaun sidadaun Timor Leste na’in 31 ne’ebe maka parte Itelejensia Indonsia nian kaptura iha Kupang, Indonesia ? nia hatan katak, parte Migrasaun seidauk simu informasaun konaba asuntu refere.

 “Ami seidauk simu informasaun ruma kona ba ida ne’e, karik sira husi Ministeriu Negosiu Estranjeiru maka simu depois imi ba konfirma to’ok iha ne’eba,”esklarese nia.

Tuir informasaun ne’ebe maka fo sai husi  Tribun News.Com katak, Intelejen husi Polres Kupang Polda NTT kaptura sidadaun Timor Leste 31 iha Naibonat ho Tuapukan, tanba tama ba area Indonesia nian la uza pasaporte.

Tuir Kapolres Kupang AKBP Adjie Indra Dwatma katak, aliende la iha dokumentus sira mós sai autor ba tuda malu entre eis sidadaun TL nian iha area refere loron 19 Outobru. Eus

Jornal Nacional