DILI,
(ANTIL) – Ministru Estadu Koordenadór Asuntu Sosiál no Ministru Edukasaun,
António da Conceição hatete, sei halo instrusaun ida atu hatene estudante sira
ne’ebé tuir ona ezame lokál no nasionál nomos seidauk. Tanba, Tersa (4/11)
semana ne’e halo ona koresaun ba materia.
“Maibé,
ha’u presiza identifika estudante sira ne’ebé la-tuir ne’e, presiza situasaun
ida atu bele atualiza iha Konsellu Ministru”, Ministru Edukasaun informa
ba ANTIL iha Palasiu Governu, Segunda (31/10). “Se bele loke fila fali
ezame segunda volta ba grupu kariensiadu sira”, katak nia.
Asuntu
ne’e, tuir nia, bainhira ME halo sansaun ruma ba estudante ida liliu karik
estudante sira ne’ebé karik hetan problema ruma iha dalan klaran, bele
prejudika estudante nia moris tomak, tan ne’e sei tetu lai.
“Investimentu
inan-aman nian besik tinan 12 hakarak sira nia oan hetan rezultadu ezame ida,
maibé to’o iha dalan klaran nia hetan problema ruma, tan de’it ida ne’e, ita fó
sansaun sei prejudika estudante nia moris ba tempu naruk”, afirma. “Entaun buat
sira ne’e tenke tetu no lori mai hetan aseitasaun iha Konsellu Ministru,
posivelmente sei iha fila fali ezame ba sira”.
Husu
kona-ba totál estudante sira ne’ebé karik la-konsege tuir ezame lokál no
nasionál, António da Conceição informa, provizoriamente tuir informasaun ne’ebé
nia iha, seidauk inklui teritóriu Timor-Leste katak aproximadamente iha
estudante na’in 39.
“Dadus
ne’ebé mak ha’u hatene, iha eskola ne’ebé ha’u ba, iha Maliana 27 pesoas
la-tuir ezame lokál, iha Baucau na’in 12, aproximademente iha 39. Ne’e eskola
sira ne’ebé mak ha’u iha informasaun no seidauk simu tan husi teritóriu tomak,
posibilidade númeru bele boot liutan,” nia informa.
Kestaun
iha estudante ruma ne’ebé grávida, ME sei rekolla dadus no buka justifika.
Ho justifikasaun, sei iha oportunidade bele loke ezame segunda ronde.
Kalendáriu
ezame lokál no nasionál ne’ebé Ministériu Edukasaun define tiha ona hodi hala’o
ezame ne’e mak hahú Segunda, 24 to’o 29 Outubru 2016. (jornalista: Rafy
Belo; editor: Rita Almeida)
Foto:
Ministru Edukasaun, António da Conceição
Sem comentários:
Enviar um comentário