segunda-feira, 31 de outubro de 2016

Maske Mosu Fallansu, Eleisaun Suku La’o Susesu

                                                             Rezultadu provisoriu eleisaun suku

DILI, (ANTIL) – Diretór Jerál Dezentralizasaun Administrasaun Ministériu Administrasaun Estatál, Abilio José Caetano rekoñese, realizasaun eleisaun suku tuir lei númeru 9/2016 iha fallansu maibé eleisaun konsega la’o ho susesu iha teritoriu Timor laran tomak.

 “Estatal rekoñese iha fallansu, ita presiza halo mudansa maibé ne’e kabe ba kompeténsia dezisaun polítika sira nian, ami tekniku labele temi atu hadi’a loos saida,” Abilio José Caetano informa iha konferénsia imprensa iha edifisiu Ministériu Administrasaun Estatal, Kaikoli, Segunda, (31/10).

Abilio hatutan, prosesu eleisaun ne’e difikuldade ida mak kestaun seguransa, hanesan iha fatin balun polísia la-asesu tanba, númeru polísia nian. Nune’e mós atetude votante sira seidauk iha sensibilidade partisipa eleisaun.

Iha fatin hanesan Diretór Dirasaun Nasionál Administrasaun Suku (DNAS), Amandio Paulino Gastão Sousa aumenta, eleisaun orgaun suku la’o ho susesu maske iha fallansu barak. “Ne’e susesu boot ida, kuandu ita kompara ho eleisaun jerál,” Paulino kompara.

Hodi aumenta susesu ne’e hatudu istória murak ba VI governu konstitusional espesialmente Ministériu Administrasaun Estatál.

Rezultadu provisoriu

Munisípiu Aileu totál suku 31, xefe suku ne’ebé eleitu ona iha suku neen, avansa ba segunda volta 25 suku, feto ida mak eleitu ona no feto nain tolu mak passa ba segunda ronde. Aldeia hamutuk 135, iha 110 mak eleitu ona no aldeia 25 mak sei passa ba segunda volta iha feto nain tolu mak eleitu ona.

Orgaun konsellu suku mane totál delegadu hamutuk 135 maibé provisoria seidauk iha informasaun kona ba eleito iha primeira volta, segunda volta. Orgaun konsellu suku feto iha nain 135 maibé informasaun provisoria hanesan mós mane seidauk iha nímeru fiksu iha primeira ronde ho segundu ronde.

Munisípiu Ainaro, suku hamutuk 21, xefe suku tolu eleitu ona iha primeira ronde, 18 avansa ba segunda ronde no feto ida mak eleitu ona. Aldeia hamutuk 131, eleitu primeira volta hamutuk 102, segunda volta 29, iha feto rua eleitu. Orgaun konsellu suku mane 131 provisoria seidauk iha informasaun, nune’e mós feto.

Munisípiu Baucau suku hamutuk 59, eleitu ona 26, ba segunda ronde 33, feto tolu mak eleitu, rua avansa segunda volta. Xefe Aldeia totál 281, eleitu primeira volta 256, segunda volta 25, feto tolu mak eleitu ona, ba segunda ronde feto seidauk iha informasaun. Konsellu suku mane 281 sira eleitu hotu iha primeira ronde, nune’e mós feto.

Munisípiu Bobonaro  totál suku 50, xefe suku eleitu iha ona 20, suku 30 avansa ba segunda ronde, feto eleitu laiha, maibé iha ida passa ba segunda volta. Xefe Aldeia totál 194, aldeia 45 eleitu ona, 149 ba segunda volta provisoria konaba feto seidauk iha informasaun. Konsellu suku mane ho feto eleitu hotu 194 iha primeira ronde.

Munisípiu Kovalima totál suku 30, totál votante 31.138, iha suku hitu mak eleitu mak eleitu ona segunda volta suku 23, feto rua mak avansa iha segunda volta. Xefe Aldeia totál 148, totál votante 31.738, iha aldeia 86 mak eleitu ona no 59 avansa segundu ronde inklui feto nain 9. Konsellu suku mane no feto totál 148 hosi totál eleitu hotu iha primeiru ronde.

Munisípiu Dili totál suku 31, suku lima eleitu iha primeira ronde, 26 pasa ba segunda ronde, feto tolu mak eleitu ona. Xefe aldeia hamutuk 241, to’o agora seidauk iha informasaun eleitu no ba segunda ronde. Nune’e mós ba konsellu suku feto ho mane.

Munisípiu Ermera totál suku hamutuk 52, eleitu ona, suku hitu ba segunda ronde suku hamutuk 45, feto ida mak avansa ba segunda ronde. Xefe Aldeia hamutuk 276, primeira volta eleitu ona 163 no 103 avansa segunda volta iha aldeia 10 eleitu hosi feto. Konsellu suku mane no feto 276 provisoria laiha informasaun.

Munisípiu Lautem totál suku 34 hosi votante 42483 iha suku 15 mak eleitu ona iha primeira ronde no 19 avansa ba segunda ronde inklui feto ida. Xefe Aldeia hamutuk 151, primeira volta iha ona 125 segunda volta iha 26. Iha feto 3 eleito ona iha primeira ronde. Konsellu suku mane no feto hamutuk 151 eleitu hotu iha primeira ronde.

Munisípiu Likisa totál suku 23 avansa hotu ba segunda volta feto iha nain 2 xefe aldeia iha 134 , eleitu iha primeira volta 71, ba segunda volta 63 inklui feto nain tolu. Konsellu suku mane no feto hamutuk 134, maibé iha feto 3 eleitu iha ronde primeiru nian.

Munisípiu Manatuto totál suku 29, xefe suku eleitu sia, segunda ronde 20 no feto ida eleitu ona no ida ba segunda ronde. Xefe aldeia hamutuk 99, primeira volta 97, segunda ronde 2 feto lima mak eleitu. Konsellu suku mane primeira volta 99, nune’e mós feto 99.

Munisípiu Manufahi totál suku 29, eleito ona 8 ba segundu ronde 21 iha feto rua mak avansa ba segunda ronde. Xefi Aldeia hamutuk 137, primeira volta 33 no avansa ba segunda volta 102 hosi totál vontante 35.936. Konsellu suku hamutuk 137 liu hotu primeiru volta.

Munisípiu Vikeke totál suku hamutuk 35, eleitu 18, segunda ronde 14. Nune’e mós xefi aldeia iha 234 maibé seidauk iha informasaun inklui konsellu suku feto ho mane.

Rejiaun Administrativu Espesial Oecusse Ambeno (RAEO) iha suku 18, eleitu rua, avansa segundu volta 16. Xefe aldeia hamutuk 63 liu hotu iha primeira ronde nune’e mós konsellu suku feto ho mane 63 liuhotu iha primeira ronde.

Eleisaun ba segunda ronde sei realiza iha loron 13 Novembru. (jornalista: Manuel Pinto; editora: Rita Almeida)

Sem comentários: