KJ Husu Aselera Prosesu Kazu Indisiplinar Polísia Nian

DILI, (ANTIL) - Komandante Jerál (KJ) Polísia Nasionál Timor-Leste (PNTL), Júlio Hornay husu atu aselera prosesu kazu indixiplinar hosi membru PNTL ne’ebé oras-ne’e sei pendenti.

“Husu atu ita hala’o servisu hodi aselera prosesu kazu indixiplinar hosi membru PNTL,” Komisariu PNTL Júlio Hornay afirma iha nia diskursu hafoin fó tomada pose ba Superintendenti, Jorge Nelson Amado Monteiro, Orlando Gomes  ho Ludgerio P. M. Lay iha Kuartel Jerál PNTL, Kaikoli, Dili, Kinta (23/12).

Superintendenti Jorge N.A.Monteiro simu pose nu’udar Xefi Investigasaun Kriminál. Antes  ne’e, okupa hosi Superintendenti Ludgerio Lay.

Superintendenti Orlando Gomes, ne’ebé antes ne’e mamuk maibé tau matan hosi Xefi Inspetór Jerál, simu fali pozisaun foun nu’udar Xefi Departementu Justisa.

Entretanti Superintendenti Ludgerio Lay ne’ebé assume hikas kargu foun nudar Xefi servisu Administrasaun no Planiamentu. Molok ne’e, kaer kargu Xefi Investigasaun Kriminál.

Komisáriu Polisia, Júlio Hornay husu ba superior PNTL sira, tenki servisu ho fuan no laran hodi servi rai doben Timor-Leste no Povu.

“Imi na’in tolu, komandu fó fiar ba imi. Husu atu servisu ho fuan no laran, atu servi povu no rai ne’e ho di’ak. Hein katak ho ita-nia prezensa, bele kontinua solusiona kazu sira-ne’ebé iha,” Júlio Hornay nia dehan tan.

Ba Superintendenti Ludgerio Lay, Komisáriu Julio Hornai husu atu konsentra iha servisu hodi fila nia mehi sira ne’ebé mak durante iha ba realidade, liu-liu oinsá prepara Planu Dezenvolvimentu Estratejiku Polísia Nasionál Timor-Leste.

“Didika imi-nia án ho vontade. Tanba ho vontade mak bele produz rezultadu servisu di’ak. Imi bele matenek, maibé sei la iha vontade, servisu mós ladi’ak ,” Komiráriu Jerál,  Hornay reafirma.  (Jornalista : Manuel Pinto/Editór: Otelio Ote )

Foto: Komisariu Julio Hornay