Lere Kestiona Tribunál Fó Livre ba Membru GAM

DILI - Xefe Estadu Maiór Jenerál FALINTIL-Forsa Defeza Timor Leste (F-FDTL), Majór Jenerál Lere Anan Timor kestiona arte-marasiais Persaudaraan Setia Hati Terate (PSHT)  ne’ebé ba sa’e sintu iha Indonézia, fila mai Polísia kaptura lori ba prosesu justisa, maibé tribunál kontinua liberta.

Tanba ne’e Xefe Estadu Maiór Jenerál, FALINTIL-Forsa Defeza Timor Leste (F-FDTL), Majór Jenerál Lere Anan Timor dehan, di’ak liu Tribunál Militár maka lidera.

“Ita haree SH oho ema, baku ema, ka’er tiha ba Tribunál husik tiha, ne’e halo nusá, ha’u dehan Tribunál mangame aban bainrua ami maka kaer, nia halo sala tenke kastigu Timor atu la’o di’ak, ne’e tenke hanesan ne’e,” dehan Lere ba jornalista sira iha Kuartél Jenerál F-FDTL, Fatuhada, Kinta (01/12).

Nia hatutan, kaer ema fragante de leitu lori ba detensaun 72 oras liu tiha tenke lori ba Tribunál, liu ne’e lei la fó dalan saida maka hanesan ne’e, kontinua hanesan ne’e Timor sei la la’o ba oin.

“Ne’ebé ha’u hanoin Polísia ho F-FDTL tenke garante estabilidade, ba militár laiha demokrásia, ba militár laiha detensaun 72 oras detensaun to’o Justisa bolu maka ba, tanba ne’e ha’u dehan tribunál tenke kuidadu tenke julga ema ne’ebé sala aplika pena la’ós ba husik fali,” dehan Lere.

Nia hatutan, husik ne’e ema ne’ebé maka la sala, tanba ne’e TL presiza duni lider ne’ebé maka hadomi nia rai.

Iha parte seluk, Xefe Estadu Maiór Jenerál FALINTIL-Forsa Defeza Timor Leste (F-FDTL), Majór Jenerál Lere Anan Timur dehan, harii tribunál militár ne’e importante, maibé la’ós nia maka deside, ne’e kompeténsia governu nian.

“Ita atu harii tribunál militár ne’e importante, maibé ne’e desizaun polítiku sira nian,” dehan Lere.

Nia hatutan, tribunál militár governu hanoin ona atu harii oinsá para bele julga militár sira duke lori ba tribunál sivíl.

“Foin lalais ne’e tribunál husu atu detein militár ida, maibé ha’u dehan ha’u nia militár ida la bolu ba julga ho fardadu, militár detein iha Polísia Militár atu julga maka bele bá,” dehan Lere.

Iha fatin hanesan, Ministru Defeza (MD) Cirilo Cristovão dehan, klaru iha Konstituisaun hatete ona iha tribunál sivíl no militar, maibé atu harii ne’e presiza rekursu umanu.

“Ita presiza duni harii tribunál militar, maibé ita presiza rekursu umanu maka hanesan ita tenke iha juiz militár, tanba ne’e maka ita tenke prepara juiz militár,” dehan Cirilo.

Nia hatutan, agora dadauk iha F-FDTL prepara hela ema na’in 13 ba juiz militár nian, presiza tempu halo formasaun ba sira, no hahú koordena ho konsellu superiór majistratura judisiál para depois formasaun, juiz, prokuradór no advogadu kada tinan halo formasaun iha sentru formasaun judisiáriu iha Kaikoli, bele inklina forsa sira bele ba tuir.

Nia espera katak tempu oin mai bele estabelese painel ida, la’ós tribunál hodi nune’e bele julga ona krime ruma ne’ebé maka envolve militár. (way)

Timor Post