LU-OLO PR FOUN TIMOR LESTE…!!!

Jornal Nacional Diário, editorial

Resultado provizorio eleisaun Presidensial 20 Marsu 2017 nebe fo sai husi Sekretariado Tekniku administrasaun eleitoral (STAE), kandidatu Presidente Republika, Francisco Guterres ‘Lu-Olo’ hetan votos maioria 57,08% no segundo mais votado, kandidatu Presidente Republika Antonio da Conceicao, 32, 47% no kandidatu nen seluk hetan presentajen kiik.

Maske resultado nee sei konsiderado provisoriu tamba sei lori ba Tribunal Rekursu hodi valida, maibe votos nebe  Lu-Olo iha konprova ona Lu-Olo manan primeira rounde eleisaun Presidensial 20 Marsu 2017 no sai Presidente Republika ba tinan 2017 – 2022.

Lu-Olo bele dehan eleitu ona sai Presidente Republika Timor Leste nian ba dala 4 tamba priense lei eleitoral nian konaba 50+1%. Votos nebe Lu-Olo hetan liu bareira nebe iha lei eleitoral nian (57,08%).

Ho resultadu eleisaun nee, Lu-Olo sai Presidente Republika ba dala 4 hafoin restaurasaun independensia 20 de Maiu 2002. No Presidente Republika ba dala 6 hafoin Presidente Francisco Xavier do Amaral (matebian), Nicolau Lobato (matebian), Xanana Gusmao, Jose Ramos Horta no Taur Matan Ruak.

Lu-Olo kandidatu Presidente Republika partido FRETILIN nian nebe hetan apoiu husi lider karismatiku, Kayrala Xanana Gusmao nebe mos nudar atual Presidente Partido CNRT.

Atu ba tuur kadeira numeru um Republika Demokratika Timor Leste (RDTL 1 ) nee laos fasil, tenki liu prosesu naruk, lori tempo, presisa sakrifisiu no dedikasaun ba rai no povu ida nee.

Kadeira Presidente Republika Lu-Olo buka tinan 10 nia laran foin mak kaer metin iha liman laran. Lu-Olo kandidata an ba Presidente Republika iha eleisaun presidensial 2007 maibe lakon ho Jose Ramos Horta iha segunda rounde no iha eleisaun presidensial 2012, Lu-Olo kandidata an ba segunda vez maibe mos lakon ho Taur Matan Ruak iha segunda rounde.

Karik tamba atu fo susesu ba Lu-Olo ninia ambisaun mak partido FRETILIN iha 2013 muda postura Politika husi oposisaun ba partido nebe sai kontribuidor ida ba governu Xanana nian.

Ho mudansa postura politika nee, lori Mari Alkatiri lidera ZEESM Oecusse Ambeno, Xanana entrega governu ba Rui Maria de Araujo membru CCF no ikus mak fo susesu Lu-Olo ba Presidente Republika.

Eleisaun presidensial iha 2017 lao iha ambiente nebe trankuilu, pasifiku maibe nivel partisipasaun sidadaun nian mak menos tamba rejistu STAE nian kuaze 743 mil eleitores maibe kuaze 500 an mil deit mak tuir votasaun. Nee signifika nivel aprtisipasaun sidadaun nian iha festa demokrasia nee minimu tebes kompara ho eleisaun priode 2007 no 2012 liu ba.

Nunee mos ba kandidatu nain 7 seluk, tenki simu realidade nebe iha. Festa demokrasia nee jogu politiku nebe povu mak sai estrela kampo nebe hakarak hatama golu kandidatu nebe deit tuir hakarak no merese sai Presidente Republika Timor Leste nian.

Manan nee orgulhu ida maibe sai lideransa, sai ukun nain ida nee dezafiu bot? tamba ukun nain nee ninia responsabilidade bot atu oinsa bele responsabilizasa konfiansa povu nebe deposita ba ita atu halo lao durante tinan lima mandatu.

Susesu ka la susesu durante kaer ukun iha tinan lima nia laran nee depede ba ita nia atetude, karakter lideransa. Xavi ba suksesu iha ukun mak tenki haraik an, rona no simu kritika no autorika, labele egoista, sai defensor povu nian no mos ukun laos hein atu povu mak servi maibe ukun nain mak tenki servi povu. Parabens e bom susesu .*