quarta-feira, 22 de março de 2017

LU-OLO PREZIDENTI FOUN RDTL

PARTILHAR
Segunda 20 Marsu 2017 povu Timor Leste (TL) iha territóriu tomak, inklui iha Australia (Darwin-Sidney) no Portugal Lisboa ejerse ona sira nian direitu de votu hodi hili Prezidenti Repúblika (PR), ne’ebé atu lidera RDTL ba periodu 2017-2022.

Iha eleisaun Prezidensiál periodu ida ne’e, iha kandidatu na’in walu mak konkore ba ema númeru um iha RDTL ne’e.  Kandidatu na’in 8 ne’e mak hanesan, Kandidatu númeru 1 António Maher Lopes ‘Fatuk Mutin, Kandidatu númeru 2 Francisco Guterres ‘Lu-Olo’, 3 Amorin Vieira, 4 Jose Neves ‘Samala-Rua’, 5 José Luis Guterres, 6 Maria Ângela Freitas, 7 Luis Tilman no 8 António da Conceição ‘Kalohan’.

Maibé kandidatu husi kandidatu na’in 8 ne’e, Kandidatu númeru 2 Francisco Guterres ‘Lu-Olo’ maka hetan votus ne’ebé aas liu.

Rezultadu privizóriu apuramentu nasional hatudu katak, Kandidatu númeru 2 Francisco Guterres ‘Lu-Olo hetann votus 294,938  (57,08%) no kandidatu númeru 8 António da Conceição ‘Kalohan’ hetan votus 167,760 (32,47%).

Entretantu kandidatu na’in nen (6) seluk hetan votus ne’ebé ki’ik.

Husi rezultadu provizóriu apuramentu nasionál STAE nian ne’e, bele nota katak, Dr. Francisco Guterres ‘Lu-Olo’ maka sai Prezidenti Repúblika foun ba RDTL ba periodu 2017-2022. Tanba haree rezultadu kontajen ne’e, Francisco Guterres ‘Lu-Olo’ hakat liu ona bareira lei eleitoral 50+1 porsentu. Nune’e laiha ona posibilidade ba eleisaun segunda ronda.

Husi sorin seluk Diretor Jeral Sekretariadu Tekniku Administrasaun Eleitoral (STAE), Acelino Manuel Branco, liu husi konferensia imprensa Tersa feira (21/3), iha STAE nasional Caicoli Díli, fó sai katak, rezultadu apuramentu nasionál STAE ba eleisaun prezidensial periodu 2017-2022, Francisco Guterres ‘Lu-Olo’ hetan 57,08% no António da Conceição ‘Kalohan’ 32,47%, no kandidatu na’in 6 seluk ho persentajen kiik.

Iha primeiru dia loron Segunda feira dia 20 de Marsu tinan 2017, rezultadu provizóriu ne’ebé mak kandidatu númeru 2  Francisco Guterres ‘Lu-Olo’ hetan 59,79% no António da Conceição ‘Kalohan’ 25,51% deit. Maibé depois de dadus husi Munisípiu sira seluk tama tan hodi halo mudansa ba rezultadu ne’ebé antes ne’e kada kandidatu sira hetan.

“Munisípiu sira ne’ebé mak remata tiha ona nia apuramentu tuir lei nia prediksaun, tuir loloos bele to’o iha aban tanba tuir lei 48 oras mak sei iha tempu para konklui prosesu apuramentu. Maibe ho kondisaun no preparasaun inklui ko’operasaun entidades hotu nian iha Munisípiu mak prosesu apuramentu ne’e, la’o lalais liu do que ita nia predikasaun antes, ne’ebé ita bele dehan katak di’ak teb-tebes ne’ebé Munisipiu sira ne’ebé mak nia apuramentu hotu kedas hodi transporta kedas mai iha apuramentu nasional mak Baucau, Aileu nomos Liquiça. Entretantu Munisípiu sira seluk balun foin iha dalan no balun tanba problema internet nune’e nia apuramentu seidauk hotu mak hanesan Munisípiu Bobonaro nomos Munisípiu Ermera,”Acelino Branco informa ba jornalista sira liu husi konferensia ba imprensa iha STAE, Caicoli, Tersa (21/3/2017).

Acelino afirma, eleitores ne’ebé rejistadu hamutuk 743.150 votantes. No votantes ne’ebé partisipa iha votasaun iha eleisaun prezidensial 2017-2022, hamutuk 504,730 (67,92%) no votantes ne’ebé la vota iha 214.337. Votus validus hamutuk 493,211 (97,74%) branco 2,789  (0,55%) nulu 8,393 (1,66%) reklamadu 205 (0,04%), rezeitadu 32 (0,01%).

Husi rezultadu provizóriu ne’e kandidatu numeru 1 hetan votus hamutuk 9.098 (1,76%),  númeru dois (2)  hetan votus 294,938  (57,08%), numeru 3 hetan votus 4279 (0,83%), numeru 4 hetan votus 11,462 (2,26%), numeru 5 hetan votus 13,513 (2,62%), numeru 6 hetan votus 4353 (0,84%)  kandidatu no 7 hetan votus 11,124 (2,15%) no kandidatu númeru 8 hetan votus 167,760 (32,47%). Rezultadu provisoriu to’o tuku 21:00 kalan.ola

Jornal Nacional Diário
PARTILHAR

Author: verified_user

Publicação luso-timorense sem fins lucrativos

0 comentários: