TAUR HUSU BA PR FOUN HAKBESIK POVU

Prezidenti Republika (PR), Taur Matan Ruak, husu ba Prezidenti Republika foun periodu 2017-2022 atu tau prioridade ba nasaun no hakbesik an bei-beik ba povu.

“Hili sai Prezidenti tenke tau matan ba ita nia nasaun no prioridade ida ne’ebe mak tuir mai ne’e iha tinan lima nia laran, I ha’u hein katak buat hotu-hotu la’o di’ak, i rezultadu ne’e sai di’ak ba ita nia nasaun no povu tomak,” hateten PR Taur Matan Ruak, ba Jornalista sira iha Sentro Votasaun, Suku Meti¬aut, Postu Administrativu Kristo Rei, Munisipiu Dili, Segunda (20/03/2017).

Taur afirma katak, kandidatura ne’ebe mak seida’uk hetan konfiansa husi povu hodi eleitu sai Prezidenti Republika tenke fuan bo’ot hodi simu rezultadu, tanba jogador ne’ebe mak di’ak no profesional hatene manan no hatene lakon.

“Ha’u nia pedidu mak ida ne’e, jogador di’ak, klubu professional ne’ebe mak hatene manan no hatene lakon. No ida ne’ebe mak manan Timor manan ita hotu manan,” hateten PR Taur Matan Ruak.

Prezidenti Republika Taur Matan Ruak agradese ba povu Timor tomak iha femismu, komportamentu di’ak durante kampania sira, nomos ba kandidatu nain walu ne’ebe hala’o kampania la’o kapas no di’ak tebes.

Liu husi opurtunidade ne’e mos, hato’o hela mensagen ba povu tomak liu husi konfiansa ne’ebe ukun durante tinan lima (2012-2017) ne’ebe nia parte rai hotu rekordasaun di’ak no át.

“Ida át ne’e imi husik hela ba ha’u ho ha’u nia familia, di’ak ne’e ita hotu nian, ba ita nia povu no nasaun,” hateten PR Taur Matan Ruak. Eus

Jornal Nacional Diário