terça-feira, 23 de maio de 2017

Xanana‐Taur ‘Sees‐Malu’ Durante Loron Boot

PARTILHAR
DILI: Durante loron boot ho selebrasaun importante tolu, tomada de pose Prezidente Repúblika foun, Restaurasaun Independénsia no Inaugurasaun Estátua Proklamadór Francisco Xavier do Amaral, Xanana Gusmão no Taur Matan Ruak sees malu beibeik.

Iha serimónia pose Prezidente Repúblika, Francisco Guterres ‘Lu‐Olo’, Xanana Gusmão la partisipa. Nune’e, iha inaugurasaun estátua Proklamadór Francisco Xavier do Amaral, Taur Matan Ruak mak la hola parte fali. Ne’e duni, durante selebrasaun ne’e lider rezisténsia na’in rua ne’e la hasoru malu.

Tanba ne’e, Xanana Gusmão ne’ebé lori Taur no Lu‐Olo ba Palasiu Ai‐Tarak Laran, la konsege fó agradesimentu ba Taur Matan Ruak no la kongratula mós Francisco Guterres ‘Lu‐Olo’ iha momentu tomada de pose.

Bainhira jornalista sira konfirma auzénsia Xanana Gusmão nian iha serimónia ne’e komisaun organizadora rasik mós laiha informasaun.

“Xanana la mai ne’e, ami la hatene”, dehan Ministru Dionísio Babo Soares, ne’ebé mós nu’udar prezidente komisaun organizadora selebrasaun restaurasaun independénsia ba dala XV no tomada de pose prezidente repúblika foun, iha Tasi Tolu‐Dili, Sábadu (20/5).

Iha fatin hanesan, Prezidente Parlamentu Nasionál (PN), Adérito Hugo da Costa hateten, Xanana hola parte iha serimónia ne’e, maibé públiku mak la haree.

“Xanana mai maibé ita mak la haree, tanba serimónia ne’e nia mak organiza,” Adérito.

Entretantu, tuir observasaun diáriu INDEPENDENTE, serimónia pose partisipa kompletamente husi lider antigu sira, úniku Ministru Planeamentu Investimentu Estratéjiku (MPIA), Kay Rala Xanana Gusmão mak la partisipa.

Nune’e, observasaun ba inaugurasaun Estátua Proklamadór Francisco Xavier do Amaral nian lider antigu sira hanesan Prezidente Repúblika sesante, Taur Matan Ruak, no Eis Prezidente Repúblika, José Ramos Horta mós la partisipa.

Entretantu iha serimónia inaugurasaun Estátua ne’e, partisipa Prezidente Repúblika (PR), Francisco Guterres ‘Lu‐Olo’, Primeiru Ministru (PM), Rui Maria de Araújo, Prezidente Parlamentu Nasionál (PN), Adérito Hugo da Costa, Ministru Konselleiru no Ministru Kay Rala Xanana Gusmão, Majór Jenerál F‐FDTL Lere Anan Timur, Prezidente ZEESM, Mari Alkatiri no Mau‐Huno.

Humberto dos Santos | Independente
PARTILHAR

Author: verified_user

Publicação luso-timorense sem fins lucrativos

1 comentários:

Daniel Jose de Jesus eis Sec. SELCOM disse...

Maun asuwain sira imi bele sees malu maibe keta oho malu tan hanesan oho imi nia maluk asuwain Mauk Moruk. Imi antigos kombatentes hirus malu, odi malu no oho malu mak ema sira ne'ebe uluk lakohi rai ne'e uku-an sira hamnasa, sira sei dehan sira konsege soran tiha ona imi.

Imi fiar ka la fiar wiranto ho nia ema sira ho nia oan no beioan sira mak sei sai heroi iha ita nia nasaun, sira mak sei goza imi nia terus no susar durante tinan 24 ne'e nia rezultadu.Imi asuwain sira hirus malu, odi malu, oho malu ne'e katak imi rai hele ona odi ho vingansa ba imi nia gerasaun sira,aban-bainrua sira boot sira mos sei halo tuir imi, mak sira sei oho malu mohu,ema seluk mak sei goza Timor ne'e nia dia'k.

Imi matan kala delek no tilun kala diuk hotu ona,ema barak ne'ebe uluk lakohi ukun-an ohin loron sira deklara sira nia an veteranu, sira ne'e balu uluk HANSIP,POLISIA, MILITAR no MAUHU imi la haree no la rona katak ohin loron veteranos falsu barak iha ita nia nasaun,sira simu osan no goza,imi oho malufali, imi simu la goza nune'e mos imi nia gerasaun sira.