terça-feira, 23 de maio de 2017

Vox-Pop 20 de Maiu, 15 Presiza Hadia Dezenvolvimentu

DILI - Timor-Leste (TL) restoura ona nia independensia bad ala 15 maibee povu barak seidauk sente dezenvolvimentu ba iha ukun rasik aan.

Tuir Madre Alsinda Oliveira katak, ho komemora loron nee nia sente kontente tebes no mos agradese ba Maromak tanba bele fo oportunidade mai Timor hodi hanoin indepedensia 20 de Maiu.

Hanesan tinan 15 nee iha buat barak ita simu no aprende ona, maske ita nia nasaun foun ida nee foin halo tinan 15. Iha buat barak halo ona maibe iha buat barak sei presiza hadia diak liutan. Hanesan husi parte edukasaun, iha eskola Nobel da Paz kompara ho tinan hirak liu ba. Tanba nee ami professor sira hamutuk ho ami nia direitur hakarak eskola ida nee sai modelu neebe diak ba nasaun Timor,”dehan Madre Alsinda ba STL hafoin remata isar Bandeira iha Eskola Nobel da Paz, Kintal Boot, Sabado (20/5/2017).

Iha fatin hanesan direitur da eskola EBC Nobel da Paz, Agapito R. Soares hatete,nia mos iha espransa ba komemorasaun restaurasaun 20 de Maiu ba dala 15, desde 19 kalan povu Timor tomak selebra loron nee.

Ita mos agradese ho loron nee ita nia prezidente foun mos simu ona tomada de pose, entaun ho komemorasaun ida nee ita bele hanoin fali buat neebe ita halo ona iha tinan hirak liu ba. Oinsa ho tinan nee ita atu tur hamutuk hodi fo liman ba malu atu nunee hodi prepara ita nia aan hodi hasoru loron neebe mai iha aban bainrua nian,”katak Agapito.

Maibee oinsa hadia dezenvolvimentu, no oinsa atu organiza joven sira atu kria mos estabilidade mai rai ida nee. Atu nunee bele lori dezenvolvimentu ba rai nee no nasaun neebe foin hamrik iha tinan 15 nia laran, esplika Agapito.

Estudante Juliao da Costa Belo hatete, nia esperansa ba 20 de Maiu tanba heroi sira sakrifika ona sira nia aan liu husi funu neebe naruk, ho intrese katak atu lori nasaun nee ba independensia.

Hanesan joven sente kontente tanba aproveita ona saida mak heroi sira halo hela ba ita nia nasaun. Maibee atu ukun nasaun ida nee atu laoo diak, ida nee   fila fali ba ita nia nai uluk, atu oinsa bele lori nasaun nee iha paz no estabilidade nia laran,” esplika Juliao.

Estudante Cristiana de Jesus Ximenes hatete, ho komemora 20 de Maiu ba dala 15 nee nia sente orgulhu tebes. Maske lamarka prejensa iha Tasi-Tolu liu-liu ba loron especial ba tomada de pose prezidente foun.

Maibee ami sente kontenti tanba ami bele selebra loron nee ho diak iha sira nia eskola,espera katak 20 de Maiu tinan 16 bele selebra sai diak liu tan,”esplika nia.

Estudante Angelina P.Amaral hatete, nia mos fo agradese uain neebe importante ba loron 20 de maiu, iha oportunidade nee husu mos ba iha prezidente foun atu hadia diak liu tan dezenvolvimentu  iha area rurais liu-liu estrada bee-Mos liu-liu dezenvolvimentu ba edukasaun iha TL.

Estudante Nelson Gomes hatete, nia kontente tanba bele selebra loron nee iha sira nia eskola. Mesmo lapartisipa iha Tasi-Tolu maibee ho sermonia simples nee hodi bele hatudu ona nasionalimso no patriatismo ba rai doben ida nee.

Tanba nee husu ba jerasaun foun sira atu kontinua kaer metin nafatin buat neebe jerasaun tuan sira luta ona. Atu nunee bele ba nati tuir nafatin saida mak jerasaun tuan sira halo ona iha tempu pasadu. Sonia Ferreira/Joao Fatima

Suara Timor Lorosae

Sem comentários: