quarta-feira, 18 de outubro de 2017

“AMP Kontra Partidu Ka Ema Ida”


DILI, (TATOLI) – Debate no apresiasaun programa governu dahituk ba loron tolu iha Parlamentu Nasionál ohin seidauk konvense deputadu hosi opozisaun (Aliansa Maioritária Parlamentár-AMP). Tanba ne’e, Primeiru-Ministru, Marí Alkatiri kestiona asaun ne’e kontra partidu atu ukun ka kontra ema ida.

“Diskusaun programa governu da-hituk durante loron tolu nia laran iha Parlamentu Nasionál (PN) maibé laiha entendimentu hosi Aliansa Maioritária Parlamentár (AMP), karik imi kontra partidu atu ukun ka kontra ema ida, sé ha’u mak sala, ha’u prontu hatan”, Alkatiri hatete iha PN, ohin.

Nia hatutan, sé aliansa mak kontra presiza klarifika hodi hato’o proposta atu bele konvense. “Ha’u la husu sasan barak, programa la konsisténsia mak ne’ebé no ida la koerente presiza ita boot sira halo proposta atu sai koerente”, afirma tan.

Tuir nia, kuandu Negosiadór Prinsipál Delimitasaun Fronteira Marítima, Kay Rala Xanana Gusmão mak prezensa iha ne’e mós nia bele tuku meza. “Maibé ha’u sei buka ko’alia ho nia atu ami bele halo konferénsia ida hodi esplika tanba saida mak partidu FRETILIN halo koligasaun ho PD de’it”.


Nia konta, bainhira rona informasaun katak sé mak obriga sé no sé mak dada sé.  Nia hatan: “Ha’u hein Prezidente Partidu CNRT,  Kay Rala Xanana Gusmão kuandu fila mak ha’u ko’alia ho nia”.

Xefe Governu afirma, la-gosta ko’alia kuandu Xanana Gusmão laiha, maibé bainhira fila hosi Portugal mak sira nain rua buka malu hodi ko’alia.

Nia husu boot ba AMP iha entendimentu programa atu bele kontribui pozitivamente. Matak ida-idak nian no tasak ita hotu nian, FRETILIN tein tasak ona maibé labele han mesak, katak tan.

Enkuantu, Prezidente Bankada KHUNTO, Luis Roberto afirma, AMP laiha intensaun atu kontra programa, maibé só kontra de’it governu minoritária mak hakarak kaer governu.

Jornalista: Zezito Silva | Editora: Rita Almeida

Foto: Primeiru-Ministru, Marí Alkatiri hamutuk ho ninia estrutura partisipa debate no halo apresiasaun programa governu ba loron tolu iha Parlamentu Nasionál, ohin. Foto GPM

Sem comentários: