quarta-feira, 18 de outubro de 2017

PD Hamutuk ho FRETILIN Tanba Kompromissu Programa

DILI, (TATOLI) – Ministru Estadu no Ministru Rekursu Minerais, Mariano Assanami Sabino afirma Partidu Demokrátiku (PD) hola parte iha koligasaun la’os tanba kadeira maibé kompromissu programa no kontinuasaun.

“PD hola parte iha koligasaun ida ne’e la’os tanba kadeira maibé ami husu kompromissu ba programa no kontinuasaun, nune’e FRETILIN simu, tanba ne’e mak fó saida de’it ami simu”, tenik iha diskusaun programa governu konstitusionál dahituk ba loron datoluk nian iha plenária Parlamentu Nasionál (PN), kuarta (18/10).

Hodi haktuir, prosesu hamosu Planu Estretéjiku Dezenvolvimentu Nasionál (PEDN) atu halo revizaun ba planu ne’ebé halo ona iha 2002 ne’ebé lidera husi líder nasionál, Xanana Gusmão iha governu FRETILIN nian momentu ne’eba.

Iha 2007 halo revizaun atu ajusta situasaun foun, tanba ne’e bainhira halo PEDN, haleu teritóriu tomak hodi konsulta ho povu hodi fó sira nia hanoin no idéia la’os partidu de’it. Nune’e PEDN povu tomak ninian tanba ema hotu kontribui.


“PD sei la-hakiduk tanba Planu Estratéjiku Dezenvolvimentu Nasionál mak ita nia interese komum no ita nia hakarak para bele la’o nafatin ba oin”, afirma.

Nune’e nia dehan, partidu ida-idak bele ho ninia dalan rasik no nia métodu rasik maibé sistemátika mak husi dezenvolvimentu sosiál, infraestrutura, ekonomia no institusionál ne’ebé tenke komunga hodi bele la’o ba oin.

“Presiza vizaun komum ida ne’ebé mak ita bolu interese nasionál, diskusaun ba oin bele kontinua”.

Jornalista: Julia Chatarina | Editora: Rita Almeida

Foto: Lider partidu FRETILIN, Marí Alkatiri ho PD, Mariano Assanami Sabino, entrega akordu koligasaun ba Prezidente Repúblika, Francisco Guterres Lú Olo iha Palásiu Prezidente Nicolau Lobato. Foto dokumentasaun Tatoli

Sem comentários: