Governu timoroan nia programa bele "la liu" de'it ho proposta rejeisaun hosi opozisaun

Programa hosi Governu Konstitusional dahitu, ne'ebé tenki haruka ba Parlamentu Nasional iha loron-tersa, la tuir obrigasaun hetan votasaun no nia reprovasaun depende de'it, esensialmente, hosi aprovasaun ba proposta rejeisaun ida hosi opozisaun.

Prosesu ne'e sai importante tanba Governu timoroan ne'ebé lidera hosi Mari Alkatiri iha baze hosi koligasaun minoritáriu ida ne'ebé harii hosi Frente Revolucionária do Timor-Leste Independente (Fretilin) - ne'ebé iha deputadu na'in 23 - no hosi Partidu Demokrátiku (PD) - ne'ebé iha fatin hitu.

Opozisaun kontrola fatin 35 sira seluk iha Parlamentu Nasional (PN) no deputadu sira ne'e asina ona iha semana liubá karta ida ba Prezidente Repúblika hodi hatete katak sira prontu sai hanesan alternativu ida hosi Governu bainhira programa ezekutivu nian hetan reprovasaun.

Tuir dalan formal, no hanesan defini iha Konstituisaun, Programa Governu nian, la presiza hetan votasaun, tanba haruk de'it ba votasaun bainhira bankada ida aprezenta proposta ida rejeisaun nian ka bainhira Governu solisita votu ida konfiansa nian.

Bainhira la akontese asaun sira ne'e testu ne'e hetan de'it debate durante máximu loron lima konsekutivu - ka entre loron-segunda no loron-sesta tuirmai, haktuir hosi kalendáriu previstu - bele to'o final hosi debate "hosi bankada parlamentar ruma (...) hodi husu nia rejeisaun ka Governu husu votu konfiansa ida".

Konstituisaun timoroan defini regra sira kona-ba aprovasaun hosi dokumentu sentral ezekutivu nian ne'ebé maka tenki iha "objetivu sira no knaar sira ne'ebé maka hakarak halo, medida sira ne'ebé hili no orientasaun polítika prinsipal sira ne'ebé maka hakarak halo tuir iha área sira hosi atividade governamental nian".

Lei baze esplika katak testu tenki haruka ba deputadu sira hodi halo "apresiasaun" to'o loron 30 dezde Governu - ne'ebé simu pose iha loron 15 Setembru - hahú funsaun no defini katak "rejeisaun hosi programa Governu nian eziji maioria absoluta hosi deputadu sira ne'ebé maka iha funsaun ativu sira".

Iha senáriu ida ne'ebé maka rejeita Programa Governu nian - ne'ebé implika demisaun hosi Governu no xefe Estadu tenki demiti primeiru-ministru - Prezidente Repúblika, iha prátika, sei iha opsaun rua: rona fali partidu sira ne'ebé iha pozisaun iha parlamentu hodi hetan alternativu ida iha kompozisaun atual nia laran hodi harii Governu foun ida ka hein halo eleisaun foun sira.

Konstituisaun determina katak "Parlamentu Nasional labele sobu iha fulan neen nia laran antes nia eleisaun", ka, ho lian seluk, to'o loron 22 Janeiru 2018 deputadu atual hamutuk na'in 65 sei hala'o nafatin knaar.

Bainhira iha disolusaun, Parlamentu Nasional ne'ebé eleitu iha lejislatura foun, ne'ebé nia durasaun sei aumenta hosi tempu nesesáriu hodi kompleta períudu korespondente ba sesaun lejislativu ne'ebé hala'o hela to'o loron eleisaun nian.

Governu ne'ebé sei demiti sei hela mós iha jestaun to'o fó pose ba ezekutivu foun ne'ebé sei harii hosi solusaun rua: ka proposta foun ne'ebé aprezenta hosi partidu sira ne'ebé iha fatin iha parlamentu ka hosi parlamentu foun ida ne'ebé harii hosi eleisaun foun sira.

SAPO TL ho Lusa