UE: Anúnsiu Trump nian bele hamosu "tempu sira ne'ebé nakukun liu"

Iha loron-kinta ne'e, xefe diplomasia hosi Uniaun Europeia (UE), Federica Mogherini, hatete ona katak desizaun hosi prezidente EUA nian, Donald Trump, hodi rekoñese Jeruzalén hanesan kapital israelita nian, bele hamosu "tempu sira ne'ebé nakukun liu".

Anúnsiu hosi xefe Estadu norte-amerikanu bele "lori ita ba tempu sira ne'ebé nakukun liu duké tempu sira ne'ebé agora ita hasoru daudaun", Mogherini hatete iha konferénsia imprensa ida ne'ebé nia hatete fali katak UE defende solusaun hosi Jeruzalén ida hanesan kapital hosi Estadu rua hosi Israel ho Palestina.

"Anúnsiu hosi Prezidente Trump kona-ba Jeruzalén iha impaktu potensial ida preokupante tebes", nia hatutan no subliña katak hosi kontestu rejiaun nian "hanesan frájil tebes".

Reprezentante Aas ba Polítika Externa hosi UE insisti katak nasaun 28 iha "pozisaun ida klaru tebes no unidu", no katak "solusaun úniku ne'ebé realista ba konflitu entre Israel ho Palestina bazeia iha Estadu rua, ho Jeruzalén hanesan kapital".

Federica Mogherini salienta mós importánsia hodi evita violénsia ida, felisita apelu hosi Trump ba rekoñesimentu hosi "status quo" hosi fatin lulik sira hosi Jeruzalén.

Trump iha loron-kuarta ne'e fó sai katak EUA rekoñese Jeruzalén hanesan kapital Israel nian no afirma ona katak sei fó orden ba Departamentu Estadu nian hodi muda embaixada EUA nian hosi Telavive ba sidade ne'e.

Anúnsiu ne'ebé halo hosi Donald Trump reprezenta interupsaun ida neutralidade nian ne'ebé maka diplomasia norte-amerikanu mantén iha dékada barak nia laran kona-ba kestaun israleo-palestinianu.

SAPO TL ho Lusa