Violensia Domestika ‘Dezeña’ Tribunal Lorloron

DILI: Violensia ne’ebé akontese entre feto no mane hanesan la hotu hela de’it. Ida ne’e bale hatudu liu husi audensia julgamentu ne’ebé Tribunal Distrital Dili hala’o lorloron.

Tuir dadus ne’ebé iha, kuaze lorloron TDD sempre halo julgamentu ba kazu violensia domestika.

Prezidente Asosisaun Mazislatura Judisiariu Timor-Leste (AMJTL), Antonino Goncalves konsidera kazu violensia domestika ne’e mosu barak tanba ekonomia uma laran no deskonfia malu.

Tuir nia, uluk kazu violensia domestika ladun maibé daudauk ne’e kazu ne’e barak tebtebes ona. “Violensia domestika uluk kuaze ladun maibé agora ne’e barak demais ona. Kazu violensia (domestika) tama mai iha tribunál ne’e tanba ekonomia uma laran, deskonfia malu,” dehan Prezidente AMJTL ne’e iha nia knar fatin, TDD, Tersa (05/12).

Kazu barak, nia dehan, mosu tanba mane sira la tau-atensaun ba nia feen no oan sira.

“Dala-ruma mós labarik sira aman la fó asistensia. Inan husu osan, aman la fó, aman lori osan ba fakar iha fatin seluk, ida ne’e mak hamosu diskusaun hodi baku malu,” dehan Antonino.

Iha parte seluk, Diretór Ezekutivu JSMP Luis de Oliveira Sampaio dehan, dezde lei violensia domestika ne’ebé tama vigor iha 2010, kuaze lorloron tribunal julga kazu violensia domestika.

Molok tinan 2010, nia dehan, iha mós kazu violensia domestika barak, maibé kazu hirak ne’e para de’it iha polisia.

“Iha tinan 2016 ami monitoriza kazu violensia domestika (hamutuk) kazu 957,” dehan Luis.

Martinha Gumão | Independente