Vladimir Putin anunsia katak nia kandidatu ba prezidensial rusu tinan 2018

Prezidente rusu, Vladimir Putin, anunsia iha loron-kuarta ne'e katak sei kandidata aan ba mandatu dahhat iha prezidensial sira ne'ebé previstu ba loron 18 Marsu 2018 iha Rúsia.

"Ha'u anunsia ha'u nia kandidatura ba kargu prezidente Rúsia nian", Putin hatete durante enkontru ida ho operáriu sira hosi fábrika automóvel GAZ iha Nijni Novgorod, iha Volga, ne'ebé transmiti diretu hosi televizaun.

"Ha'u hetan fatin di'ak ida no momentu di'ak ida" ba anúnsiu, nia hatete, no operáriu sira basa-liman maka'as.

Vladimir Putin kumpri ona mandatu prezidensial rua susesivu, entre tinan 2000 no 2008. Hafoin ne'e, tanba konstituisaun bandu hodi kandidata fali, nia kaer knaar sira nu'udar primeiru-ministru bainhira aliadu Dmitri Medvedev, iha kargu prezidente nian, aumenta mandatu prezidensial ba tinan neen. Iha tinan 2012, bainhira Medvedev hakotu nia mandatu, Putin kandidata fali no eleitu fali nu'udar prezidente.

Ho taxa ida popularidade 80%, Putin, iha poder durante tinan 17 nia laran, iha vitória ne'ebé metin ona. Bainhira manán, sei kaer poder to'o tinan 2024.

Loron eleisaun sei marka ofisial hosi Konsellu Federasaun, kámara alta hosi parlamentu rusu, entre loron 07 no 17 Dezembru.

"Kandidatu veteranu sira" hosi tinan hirak ikus ne'e - líder komunista Guenadi Ziuganov, ultranasionalista Vladimir Jirinovski no liberal Grigori Iavlinski – anunsia ona intensaun hodi kandidata fali.

Hamutuk ho sira, vedera ida televizaun nian, Ksenia Sobchak, karik sei kandidata mós.

Rival ne'ebé vizível Putin nian, Alexei Navalny, hakarak sai hanesan kandidatu, maibé hetan bandu atu halo tanba hetan kondenasaun hosi justisa iha kazu sira ne'ebé, afirma katak, iha motivasaun polítika.

Oras antes halo anúnsiu, Putin sai hanesan evazivu, bainhira kestionadu kona-ba kandidatura iha enkontru ida ho joven voluntáriu sira iha Moskovo.

"Ha'u hamutuk nafatin ho imi", nia hatán bainhira sira husu ba nia katak "sei hamutuk nafatin" ho ema rusu sira.

"Hanesan desizaun ida importante tebes ba ema ruma, tanba motivasaun ne'ebé hanesan vontade úniku hodi hadi'a moris iha nasaun, hodi halo poderozu liu no seguru liu", nia hatete.

"Bainhira foti desizaun ne'e, ha'u sei iha imi nia apoiu no hosi ema sira ne'ebé hanoin hanesan imi?", nia husu, rona hakilar iha audiénsia ba "Sim!" hafoin ne'e basa-liman.

SAPO TL ho Lusa