Dezafius
no Oportunidade
Hosi:
Ambrósio Dias Fernandes (Rósio)* | opiniaun
Sétimu
governu konstitusionál simu posse iha 15 Setembru 2017, hosi S.E Prezidente da
Repúblika Dr. Francisco Guterres Lu-olo, hafoin S.E Dr. Mari Alkatiri sai
Primeiru Ministru, S.E Dr. Aurélio Guterres nu’udar Ministru Negósiu
Estranjéiru no Kooperasaun ba mandatu 2017-2022. Governu ofisialmente hahú
dadaun servisu balun no sei aprezenta tan programa governu ba dala-rua ba
Parlamentu Nasionál, iha biban ne’e hakerek-nain hakarak fó énfaze liu ba
programa Ministériu Negósiu Estranjéiru no Kooperasaun (MNEK) nian, oinsá
sétimu governu bele buka forma ne’ebé apropriadu atu reforsa no konsolida kooperasaun
internasionál. Konstituisaun Timor-Leste artigu 8 no 115 fó kompeténsia
tomak ba Governu, liu-hosi desizaun Konsellu Ministrus ba aprovasaun polítikas
jerais molok MNEK ezekuta planus no polítika estérna Timor-Leste nian. Planu
Estratéjiku Dezenvolvimentu Nasionál (PEDN 2011-2030) hatu’ur mós prinsípiu ba
polítika estérna hodi estabelese relasaun mútua ho ema no nasaun
hotu-hotu, liu-liu nasaun viziñu sira hanesan Austrália, Indonézia, ASEAN, CPLP
no Ázia Pasífiku (A Million Friends and Zero Enemies).
Depoizde
Prezidente Repúblika promulga tiha Dekretu Lei Númeru 35/2017, Lei Orgânica Do
VII Governo Constitucional, hakerek-nain konxiente katak, governu atuál hasoru
dezafiu oin-oin kona-ba impasse polítika ne’ebé seidauk remata, klaru ida ne’e
sei afeta ba ideas no polítikas ne’ebé hakerek-nain aprezenta, maibe fiar katak
governu atuál ka futuru governu bele tau iha konsiderasaun.
Dezafius
Atuais Ministériu Negósiu Estranjeiru no Kooperasaun (MNEK)
MNEK
hosi 2017-2022 sei infrenta dezafius balun ne’ebé pertinente, hakerek-nain
hakarak konsentra liu ba problemas xave tolu (3) ne’ebé sai mós maior dezafiu
ba efisiénsia no efikásia servisu no misaun MNEK nian mak hanesan menus
rekursus umanus kualifikadu no kompetente. Desde ministériu ne’e hari’i iha
2001, bazeia ba dadus ne’ebé Sr. Eis-Ministru Hernani Coelho aprezenta
ba ajénsia Tatoli katak total funsionáriu ministériu refere hamutuk ema
255 no 100 resin mak servisu nu’udar tékniku administrasaun. Realidade hatudu
katak Timor-Leste menus kareira diplomata atu halo rotasaun iha ministériu
laran nomós destaka ba Timor-Leste nia embaixada sira iha rai-liur, to’o 2016
Timor-Leste konsege estabelese ona Embaixada iha nasaun 28 no konsuladu 4 (Tuir
tarjetu PEDN nian, to’o tinan 2030, sei kompleta Timor-Leste nia Embaixada ba
nasaun 30).
Aleinde
ne’e, desde restaurasaun independénsia iha 20 Maiu 2002 too agora, MNEK mós
seidauk konsege estabelése grupu tékniku permanente no pontu fokál hosi kada
liñas-ministeriais ne’ebé reprezenta hosi Diretór Jerál ka Vice-Ministru atu
haree ba kestaun detallus implementasaun akordus internasionais, protokolus no
MoU iha âmbitu kooperasaun internasionál nivél bilaterál no multilaterál.
Problemas fundamentais ba Timor-Leste iha tinan 15 ikus ne’e maka kada
ministériu asina no halao rasik kooperasaun bilaterál ne’ebé iha ligasaun ba
área servisu sira nian, maibé laiha koordenasaun di’ak ho MNEK nu’udar ministériu
ne’ebé lidera asuntu kooperasaun internasionál no polítika estérna Timor-Leste
nian. Iróniku liu, ministériu refere mós seidauk konsege estabelese mekanismu
ruma hodi halibur dadus hotu-hotu kona-ba implementasaun akordus hirak ne’e no
la-konsege partilla no transmite informasaun hirak ne’e ho entidades
relevantes, tuir lolos MNEK presiza iha informasaun detallus kona-ba akordu
kooperasaun internasionál hira mak asina no implementa ona? Hira mak seidauk?
Tamba Saida maka la-implementa, sá fatór mak kontribui? Pergunta hirak ne’e
esensiál atu bele atuáliza nafatin informasaun hodi halo diálogu regular no
permanente ho parseirus dezenvolvimentu sira (doadores).
Iha
era globalizadu hanesan ohin loron, interasaun sosiál no kria espasu ba
komunikasaun entre instituisaun estadu ho sidadaun sira, ne’e elementu ida
ne’ebé esensiál iha prosesu konstrusaun estadu, iha kontestu ne’e hakerek-nain
foka liu ba Website MNEK, desde 2001 to’o agora seidauk dezenvolve Website hodi
atuáliza informasaun ba públiku, kona-ba progresu, oportunidade no dezafiu
ne’ebé ministériu hasoru. Dalaruma MNEK halao servisu barak no di’ak, maibé tan
deit laiha espasu atu transmite ba públiku, sidadaun bele jeneraliza prestasaun
servisu ministériu ladun-másimu.
Oportunidade
no Solusaun Ba Ministériu Negósiu Estranjeiru no Kooperasaun (MNEK)
Lideransa
foun MNEK nian S.E Ministru Aurélio Guterres no S.E Vice-Ministra Adalgiza
Magno, lori mós esperansa foun, vizaun foun, esperiénsia foun liu-liu iha
âmbitu diplomásia no polítika estérna Timor-Leste nian, iha sira nain-rua nia
kba’as atan-ha’u sujere forma balun atu responde dezafiu atuál ministériu
refere nian ne’ebé ha’u sita ona iha leten hodi prioritiza durante mandatu.
Primeiru,
aselera implementasaun Regime Transição Decreto do Governo Nº 4/2017, no
Estatutu Kareira Diplomátika Decreto-Lei Nº 23/2016, ba funsionáriu MNEK ne’ebé
prenxe ona rekezitus, hodi komesa klasifika dadaun funsionáriu atuál ba
kategoria kareira diplomátika no funsionáriu tékniku administrasaun, ho nune’e
ba futuru bainhira MNEK iha nesesidades ba rekursus umanus hodi reforsa
institusionál, presiza separa rekrutamentu ba funsionáriu tékniku
administrasaun no funsionáriu kareira diplomátika por meritokrásia, esperiénsia
profisionál no kompeténsia atu nune’e evita indisius ba KKN durante prosesu
rekrutamentu. Liu hosi meius ne’ebé mensiona iha leten, sei fasilita tebes
lideransa MNEK nian atu koloka funsionáriu ba formasaun rai-laran ka
rai-liur bazeia deit ba kada funsionáriu nia kompeténsia no kna’ar lor-loron
nian, hodi hasa’e koñesimentu, hanoin krítiku no esperiénsia profisionál hodi
reforsa dezenvolvimentu institusionál atu asegura efisiénsia no efikásia
diplomásia no polítika estérna Timor-Leste nian ne’ebé sei lori rezultadu
pozitivu mai ita hanesan nasaun foun iha Sudeste Aziátiku.
Segundu,
MNEK presiza konsolida dadaun rekursus umanus atuál iha ministériu refere hodi
estabelese no instala grupu tékniku permanente no koordena ho
liñas-ministeriais hotu-hotu ka pontu fokál sira (reprezenta hosi Diretór Jerál
ka Vice Ministru) hodi komunika ho MNEK regularmente, bainhira kada ministériu
asina-rasik akordus bilaterais, protokolus no MoU sira. Ho nune’e ministeriu ida
ne’e iha dadus kompletu kona-ba akordu hotu-hotu, hodi kontinua follow-up nia
progresu, rezultadu no obstákulu.
Terseiru,
MNEK presiza duni dezenvolve Website ida hodi públika atividades hotu-hotu
ministériu refere nian. Iha era sékulu 21 agora ne’ebé globalizadu no
dijitalizadu liu, instituisaun estadu mos presiza esforsu-an atu adapta ba
fenómena foun, ho website sei fasilita mós informasaun detallus ba sidadaun no
públiku sira hodi iha interasaun sosiál ne’ebé ativu no konstrutivu ba prosesu
dezenvolvimentu nasionál. Nu’udar ejemplu, Ministériu Finansas iha website
ne’ebé modernu tebes hodi promove informasaun ba atividades importante
hotu-hotu ne’ebé ministériu refere halao. Aleinde ida ne’e, iha mós NGO lokál
balun ne’ebé promove sira nia organizasaun no atividade liu-hosi website. Tanba
ne’e, esensiál tebes ba MNEK hanesan órgaun estadu ne’ebé responsavel ba
polítika internasionál, kooperasaun internasionál no polítika estérna
Timor-Leste nian hodi promove no haburas interasaun sosiál iha nível nasionál
no internasionál.
Atu
konklui, nu’udar nasaun foun, instituisaun estadu ne’ebé nurak iha prioridades
barak ne’ebé ejizi atu halao. Maibé atan-ha’u rekomenda ba lideransa MNEK nian
atu konsidera no prioritiza faktus ba dezafius no solusaun ne’ebé ha’u-atan
aprezenta liu-hosi artigu ne’e. Ha’u ho firmeja katak dezafiu sira ne’e presiza
seriedade hosi estadu, liu-liu MNEK nian atu rezolve molok Timor-Leste adere ba
ASEAN iha tinan hirak oin mai. Ha’u iha esperansa katak, se asuntu hirak ne’e
konsidera antes, Timor-Leste sei tama ba ASEAN ho instituisaun sira ne’ebé
sólidu, preparadu hodi implementa akordu internasionál sira no iha mehi atu
lori benefísiu diréta mai ita nia nasaun iha nível polítiku, ekonómiku, sósio
no kulturál.
*Ambrósio D. Fernandes (Rósio) - Nu’udar
Political Specialist iha Embaixada Estados Unidos America, Dili, Timor-Leste. Artigu
ida ne’e opiniaun pesoál no la-reprezenta kualker instituisaun ida.
Referénsia:
1
- Konstituisaun RDTL.
2
- Planu Estratéjiku Dezenvolvimentu Nasionál Timor-Leste nian (PEDN 2011-2030).
3
- Rejime Tranzisaun Decreto Governu Nº 4/2017.
4
- Estatutu Kareira Diplomátika Decreto-Lei Nº 23/2016.
5
- Programas Sétimu Governu Konstitusionál nian.
6
- Dekretu Lei Numeru 35/2017, Lei Orgânica Do VII Governo Constitucional
7
- Agéncia Notícia Tatoli (Timor-Leste News Agency, Tatoli)
Photo
Credit: Ministry of Finance (TLDPM)
Sem comentários:
Enviar um comentário