Fos Neebe Aat labele Faan Iha Merkadu

AILEU – Ministeriu Komersiu Industria klarefika ona, fos governu nian neebe maka aat atu labele faan iha merkadu, nunee povu labele sosa ba konsumi.

Ministru Komersiu Industria Antonio da Conceição hateten, Fos neebe maka aat nee rai kleur iha armajen, maibe klarefika ona atu labele tama iha merkadu, neebe maluk sira barak hola fos nee ho rajaun hodi fohan sira nia animal.

“Ami marka intelijensia lao hela hodi detekta situaaun sira hanesan nee, I detekta mos ema sira neebe maka halo hanesan nee, para depois hodi hare ema nia lisensa neebe maka nia halo, hare mos nia komportamentu nee rasik atu labele prejudika komunidade konsumi sasan sira neebe maka aat,” dehan Ministru Antonio, liu husi diskursu, husu no hatan, iha sosialisaun programa VII GK, iha Munisipiu Aileu, Sesta, (02/02/2018).

Iha biban nee mos Ministru Antonio hateten, konaba intrevensaun merkadu mai husi kuatru Governu, no foin dadauk nee situasaun politika afeita iha merkadu ho folin sasan sae.

Iha fatin hanesan Arao Fernandes hanesan Xefi Suku Asamau hateten, Ministru Turismu Komersiu koalia konaba intervensaun governu nian ba iha merkadu baratu, tanba tuir nia hare fos nee aat no ular maka barak, komunidade sira lakonsumi fos nee.

Entretantu Manuel da Costa hanesan komunidade Munisipiu Aileu husu ba governu atu labele faan fos aat ba komunidade sira, tanba komunidade sira laos animal. 

Carme Ximenes/Maria Lay | Suara Timor Lorosae