CNE Husu FDD Hamoos Símbolu Relijiozu

DILI: Comissão Nacional de Eleições (CNE) husu ba koligasaun partidu Frente Dezenvolvimentu Demokrátiku (FDD) hodi hasai emblema relijiozu hanesan ai-krús ne’ebé uza iha bandeira koligasaun durante ne’e.

Komisáriu CNE, Alcino Barris, xama atensaun ba partidu koligasaun FDD ne’ebé kompostu Frente Mudansa, ASDT, PUDD, UDT, PDN atu labele uza símbolu relijioza ba lema partidu nian.

Nia dehan, FDD nia símbolu ne’e ho imajen ida atu interpreta katak imajen konfisaun relijioza nian ne’ebé uza krús iha símbolu koligasaun nian. Ne’e duni, CNE bolu FDD halo klarifikasaun ba símbolu ne’e.

“Bainhira sira hatama sira nia estatutu koligasaun nia hamosu imajen ida, ami interpreta katak imajen konfisaun relijioza no presiza halo klarifikasaun tan”, tenik Alcino, iha edifísiu CNE, Kaikoli-Dili, horisehik.

Nia dehan, tuir lei, símbolu ne’e soke malu.Tanba ne’e, partidu sira iha koligasaun FDD tenke kumpre no hamoos símbolu ne’ebé iha.Lei orgánika 2/2016, iha artigu 12 deklara, labele uza símbolu relijioza no símbolu rezisténsia.

Nune’e, nia dehan, bainhira halo koligasaun tenke liu husi CNE halo revizaun hodi rekolla dadus sira ne’e kompleta mak pasa hodi hakat ba Tribunál Rekursu.

Nune’e, portavós FDD, José Luis Guterres dehan, CNE bolu FDD atu klarifika loloos símbolu koligasaun ne’ebé uza krús, tanba ne’e mak CNE husu ba FDD atu hamoos símbolu ne’e.

Nia dehan, FDD uza krús ne’e tanba antes relijiaun tama, bei'ala sira uza ona ai-krús. Tanba ne’e, FDD uza ne’e nu’udar símbolu, maibé CNE hakarak intervein entaun FDD tenke hamoos ai-krús ne’e.

Tanba ne’e, koligasaun FDD sei enkontru hamutuk hodi hili símbolu ida atu troka fali símbolu ida ba koligasaun nian. Nune’e, uza atu aprezenta ba Tribunál Rekursu hodi konkorre ba kampaña iha eleisaun antesipada.

Artur da Luz | Independente