Jenerál Lere Husu Komandante Hornay Prosesa Eskolta Xanana -TMR

DILI, (TATOLI) – Xefe Estadu Maiór Falintil-Forsa Defeza Timor-Leste (F-FDTL), Lere Anan Timur informa ona ba Komandu Jerál Polisia Nasionál Timor-Leste (PNTL) atu bolu no prosesa Corpu Seguransa Pessoal (CSP) ou Eskolta ba lider nasionál Kay Rala Xanana Gusmão no Taur Matan Ruak.

Lere lamenta tanba lider na’in rua ne’e iha munisípiu Ainaru, molok abertura kampaíña eleisaun antisipada, sira na’in rua partisipa uluk serimónia ritual ne’ebé halo hosi lider partidu Kmanek Haburas Unidade Timor Oan (KHUNTO), Naimori Bucar, iha momentu halo ritual, Xanana Gusmão ho Taur Matan Ruak tuur iha rai.

Tuir eis komandante gerrilleiru rejiaun 1 ne’e, bainhira Xanana ho Taur tuur rai, ka’er ba lisan Lospalos signifika sira na’in rua atan.

“Ha’u hateten ona ba komandante jerál katak tenke bolu no prosesa ema ne’ebé mak fó seguransa ba Xanana ho Taur tanba halo seguransa la professional, profisionalizmu servisu la iha,” Lere Anan Timur hato’o iha Komandu Jerál PNTL, Kaikoli, ohin.

Lere dehan, seguransa la profisionál, hatudu momoos katak lideransa na’in rua ne’e atu tama ba ne’ebé seguransa sira hatene ka lae no ba halo saida. Tuir loloos ne’e devér no obrigasaun seguransa nian, atu hatene.

Nune’e, nu’udar veteranu sente laran kanek no sókadu ba hahalok lider partidu KHUNTO, Lere konsidera José dos Santos Naimori Bucar la respeita lideransa másimu hanesan, Xanana Gusmão no Taur Matan Ruak, hodi nune’e haruka tuur fali iha rai.

“Ami nu’udar veteranu sente sókadu liu tanba bainhira maun na’in rua (Xanana-Taur) tur iha rai no alin Naimori Bucar nia hanesan liu rai boot ida hakarak maun na’in rua atu hakaruk ba nia, maibé hakarak afirma katak veteranu sira nunka hakaruk ba ema ida, maibé hakaruk ba lei no Estadu,” Lere fó sai nia sentimentu triste.

Hodi husu ba Timoroan hotu katak tenke konsidera nafatin maun no aman sira, lalika muda fali oan ba aman no aman baa fali oan.

Timoroan hotu tenke tane aas nafatin lider sira uluk tanba ita kesi ita nia esperansa ba sira atu bele ukun-an no labele aproveita ho demokrasia hodi lori sira hanesan hena at ruma hodi hamoos tun sa’e fo’er no les tun les sa’e.

“Ami ne’ebé terus hamutuk, susar hamutuk no balun mate ona hodi ohin loron la hamutuk ho ita, sente triste no sokadu no sente revoltadu ba hahalok ne’e” hatutan tan.

Nia fó ezemplu, ba Timor-Leste nia lisan liuliu munisípiu Lautem nian, kuandu ema tuur iha rai konsidera atan no tuur iha kadeira mak liu rai.

“Ne’e bele ministru, prezidente ka pozisaun boot, kuandu ba uma lisan tuur iha rai no liurai mak tuur iha kadeira,” nia konta lisan Lautem.

Tuir nia haree fotografia ne’ebé mosu iha facebook halo sira nu’udar veteranu sira sente laran kanek tebes, maibé keta ema mak inventa hodi manipula foto entaun Nia husu deskulpa, maibé los karik ida ne’e labele akontese ba aman nasaun sira hanesan Xanana ho Taur Matan Ruak.

To’o notísia ne’e hatún parte TATOLI seidauk halo konfirmasaun ba, Jose dos Santos Naimori Bucar hodi husu nia esplikasaun tanbasá iha momentu ne‘ebá, Prezidente CNRT, Kay Rala Xanana Gusmão ho Prezidente Partidu Libertasaun Popular, Taur Matan Ruak tuur iha rai.

Nune’e mós seidauk hetan konfirmasaun hosi parte, Prezidente Aliansa Mudansa ba Progresu, Kay Rala Xanana Gusmão ho Portavós, Taur Matan Ruak, tanba ohin sira halo kampaíña iha munisípiu Lautem.

Maski nune’e parte TATOLI sei kontinua halo tentiva hodi hetan klarifikasaun ruma hosi parte MARXAMOR (Xanana Gusmão, Taur Matan Ruak ho Naimori Bucar).

Jornalista: Zezito Silva | Editór: Manuel Pinto

Imajen: Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur. Foto Tatoli/Xisto Freitas