Primeiru-ministru timoroan
afirma, iha loron-kinta ne'e, katak fó ona instrusaun ba membru sira ezekutivu
nian hodi prepara relatóriu sira ba tranzisaun ba Governu daualuk, ne'ebé karik
sei simu pose iha fulan-Juñu.
Ha'u fó ona orientasaun iha parte
ne'e. Ha'u nia gabinete halo mós preparasaun ne'e", nia konfirma iha
deklarasaun sira ba jornalista sira.
"Ha'u iha sentidu Estadu
nian no, tanba ne'e, iha termu sira Estadu nian, hanesan importante garanti
kontinuasaun ba governasaun. Governu ne'ebé sai maka prepara buat hotu ba
Governu foun", nia esplika.
Mari Alkatiri ko'alia bainhira
hakotu enkontru semanal ho Prezidente timoroan, Francisco Guterres Lu-Olo, no
hafoin diriji tiha reuniaun ikus hosi Konsellu Ministru sira hosi Governu
Konstitusional dahitu.
Iha reuniaun ne'e, Mari Alkatiri
"agradese ona kontribuisaun ho dedikasaun hosi membru tomak hosi Ezekutivu
durante fulan ualu ne'e nia laran", no konsidera ona katak, "maski
obstákulu sira no susar sira, Governu atual konsege hatudu nia koezaun ho
kapasidade jestaun hodi defende interese nasional superior" nasaun nian,
tuir komunikadu ida Governu nian.
"Membru oioin hosi Governu
hatudu nia apresu maka'as ba konfiansa ho espíritu abertura ne'ebé maka hatudu
hosi atual xefe ezekutivu, halo balansu badak kona-ba prestasaun hosi Governu
Konstitusional dahitu no aprezenta nia apresiasaun sira kona-ba oinsá hala'o
prosesu eleitoral no rezultadu ofisial sira hosi eleisaun parlamentar tinan
2018 nian", refere ona.
Alkatiri esplika katak aprezenta
ona ba Prezidente timoroan kestaun ki'ik sira hosi "jestaun
habitual": "Prinsipal liu jere duodésimu hodi bele mantén buat hotu
funsiona". "Laiha preokupasaun ho osan. Ami iha osan to'o
fulan-Agostu ka fulan-Setembru", nia hatete.
Mari Alkatiri remete ba
"ikusmai", iha sede hosi Komité Sentral Frente Revolucionária do
Timor-Leste Independente (Fretilin) nian, reasaun ida kona-ba desizaun hosi
Tribunal Rekursu ne'ebé konsidera "hanesan laiha lójika" ba rekursu
ne'ebé hato'o hosi partidu daruak ne'ebé hetan liu votu iha eleisaun 12 Maiu
tanba deskonfia iregularidade oioin iha prosesu eleitoral.
Agora tribunal analiza hela
rejistu sira ne'ebé refere ba apuramentu nasional hosi votu sira no sei hato'o
desizaun to'o findesemana kona-ba validasaun ka la'e hosi rezultadu votu nian.
Kontajen munisipal ho apuramentu
nasional konfirma ona katak Aliansa Mudansa ba Progresu (AMP) manán ona
eleisaun lejislativu sira ho votu rihun 305 resin ka 49,6% hosi total, nune'e
halo partidu hetan fatin 34 hosi fatin 65 iha Parlamentu Nasional no
posibilidade hodi harii Governu konstitusional daualuk lahó apoiu adisional
ruma.
Iha fatin daruak maka okupa hosi
Fretilin, ne'ebé lidera ona koligasaun minoritáriu hosi Governu anterior, no
hetan votu besik rihun 211 ka 34,27% hosi total, mantén nune'e númeru deputadu
hanesan, na'in 23.
Iha Parlamentu iha mós Partidu
Demokrátiku (PD), parseiru Fretilin nian iha Governu dahitu, ne'ebé lakon
deputadu na'in rua hela de'it ho deputadu na'in lima no hetan ona votu kuaze
rihun 49 ka 7,95% hosi total.
Bainhira rezultadu sira valida
hosi Tribunal Rekursu, bele marka ona tomada pose hosi deputadu eleitu sira,
ne'ebé bele akontese entre loron 05 no 07 fulan-Juñu. Hafoin ne'e sei fó pose
ba Governu Timor-Leste ba daualuk.
SAPO TL ho Lusa
Sem comentários:
Enviar um comentário