DILI: Tribunál Distritál Dili
(TDD) halo julgamentu dahuluk ba eis-Sekretáriu Estadu Arte Kultura (SEAK),
Maria Isabel de Jesus Ximenes, tanba deskonfia utiliza osan Estadu nian hodi
sosa ‘karreta privadu’.
Tuir akuzasaun husi Ministériu
Públiku, arguida Maria Isabel Ximenes hanesan koordenadora jerál Expo Koreia
iha tinan 2012, hetan nomesaun husi Ministru Turizmu Komérsiu no Indústria
(MKIA), iha tempu ne'ebá Gil Alves.
Totál orsamentu ba komisáriu hodi
organiza pavillaun Timor nian ba espozisaun Koreia hamutuk US$ 47.500.
Iha altura ne'ebá, arguida kria
komisariadu ida hodi halo organiza ba prezensa Timor-Leste nian iha expo ne’ebé
kompostu husi ema na’in ualu, ida destakadu husi ministériu no kontratadu na’in
hitu.
Kuantia orsamentu US$ 47.500 ne’e
arguida foti husi banku hodi gasta ba sosa ekipamentu eskritóriu, saláriu, no
hola karreta ida, maibé arguida la rejistu karreta ne’e hanesan patrimóniu
estadu nian no la rekere matríkula ofisial.
Karreta ne’e sirkula nafatin ho
matríkula privada no bainhira utiliza hotu karreta ne’e para iha arguida ninia
uma.
Kompra sira ne’ebé halo ho osan
kuantia US$ 47.000 ne’e halo la liu husi tenderizasaun, maibé ajusta direitu.
Nune’e, arguida la aprezenta fatura husi despeza sira ne’e hotu.
Espesifikasaun husi totál osan
47.000 mak hanesan tuir mai, iha loron 30 Maiu 2012, arguida halo rekerimentu
dirije ba diretora tezoureiru hodi husu atu kuantia US$ 22.750 hodi depozita ba
ninia konta pesoál, ho justifika katak kuantia ne’e destinadu hodi selu
saláriu.
Arguida mós la kontrola membru
komisáriu sira ne’ebé simu ajuda kustu ne’e ba Koreia, tanba nu’udar
koordenadora jerál expo iha devér atu husu repozisaun ba osan ne’e.
Ho ninia hahalok arguida apropria
kuantia orsamentu sira hanesan $22.750 ne’ebé depozita ona ba ninia konta
pesoál.
Arguida mós la administra no
ezekuta orsamentu ne’ebé iha hodi organiza prezensa Timor-Leste nian iha expo
Koreia ho kuidadu no dilijénsia ne'ebé ninia kargu ezije, nune’e hamosu
prejuizu ba Estadu ho montante US$ 9.186.
Ho atitude ne’e hamosu prejuizu
ba Estadu ho valór US$ 28.460 ba folin produtu lokál hirak ne’ebé lakon, ba
ninia transporte no ba multa ne’ebé Estadu iha obrigasaun atu selu.
Arguida mós hamosu prejuizu ba
Estadu no tau iha risku boa governasaun no independénsia ne’ebé nu’udar ninia
obrigasaun bainhira ezerse funsaun sira, tanba la rejista patrimóniu Estadu
nian.
Arguida viola ninia devér
legalidade, imparsiál no boa governasaun administrasaun ba bens públiku sira
ne’ebé iha ninia podér hodi hetan benefísiu ekonomia ilejítimu sira hodi hamoos
prejuizu ba Estadu ho valór hanesan.
Arguida halo ho livremente no
konxientemente, nia hatene hela katak ninia hahalok hirak ne’e nu'udar proibidu
no punidu husi lei.
Ho ida ne’e, Ministériu Públiku
akuza arguida ho krime tolu kompostu husi krime pekulatu, krime administrativa
neglijente, ikus liu krime abuzu podér.
Hataan ba akuzasaun hirak ne’e
arguida Isabel Ximenes hateten, husi akuzasaun ne’e balun loos balun sala. Tuir
nia, ida loos ne’e, karreta ne’e nia sosa ho pensamentu ida katak ninia membru
sira presiza karreta hodi halo servisu diária.
Nia mós konfesa katak la hatene
regra normál bainhira uza osan Estadu, atu sosa viatura ruma tenke liu husi
prosesu aprovizionamentu no tenderizasaun.
“Ha'u la hatene sistema ne’e ida,
hau hatene maka sosa karreta hodi fasilita servisu”, nia deklara, iha Tribunál.
Aleinde ne’e, nia afirma, karreta
ne’e hafoin utiliza destakadu iha ninia rezidénsia, ho razaun fundamentál katak
fatin servisu la seguru atu rai karreta (fatin servisu iha CCD).
Kona-ba orsamentu ne’ebé depozita
ba ninia konta bankária pesoál ho montante US$ 22.750, nia hateten, iha altura
ne'ebá husu osan ne’e hanesan rezerva hodi labele tarde selu staff sira, maibé
ikus mai osan ne’e la utiliza ate agora no sei rai hela iha arguida ninia konta
bankária.
“Osan ne’e daudaun iha hela ha'u
konta bankária, ha'u la utiliza. Ha'u iha hanoin atu fó fila maibé atu fó ba
sé”, nia hateten.
Hafoin rona deklarasaun arguida,
juis prosesu deside marka fali julgamentu ba tempu seluk hodi rona sasin.
Julgamentu ne’e prezide husi juis
koletiva Francisca Cabral, José Maria Araújo, Maria Solana, Ministériu Públiku
reprezenta husi Prokuradór Jacinto Babo, Arguida hetan asisténsia legál hosi
Defensór Públiku, Rui Guterres.
Martinha Gusmão | Independente
Sem comentários:
Enviar um comentário