Indonézia Prontu Koopera Hametin Seguransa Fronteira

DILI: Relasiona ho informasaun terrorizmu ne’ebé halo povu pániku Embaixada Indonézia iha Timor Leste prontu koopera hametin seguransa iha fronteira entre nasaun rua ne’e hodi evita infiltrasaun terrorista mai Timor-Leste.

Embaixadór Indonézia ba Timor Leste, Sahat Sitorus hatete, aktu terrorizmu daudaun ne’e mosu sira nia parte hato'o ona ba Prezidente Repúblika Indonézia hodi tau seguransa metin hodi iha área fronteira terrestre nasaun rua ne’e.

“Ami mós servisu hamutuk ho seguransa Timor nian hodi halo kontrolu másimu”, dehan nia, iha nia iha Palapasu-Dili, horisehik.

Seguransa iha fronteira oras ne’e daudaun hetan kontrola durante oras 24 nia laran. Forsa sira iha área ne'ebá prontu fó seguransa.

Ne’e duni, servisu hamutuk entre nasaun rua ne’e nafatin komunika malu, nune’e asegura ema sira ne’ebé iha hanoin aat no laiha responsabilidade labele tama to’o mai Timor-Leste.

Tuir nia, maski fasilidade iha fronteira ne’ebé sei menus, maibé presiza aumenta nune’e nafatin seguru.

Sahat esplika, asaun terrorizmu halakon ona Estadu Indonézia, liu liu parte ekonomia no seguransa, ne’ebé prejudika komunidade sira moris la hakmatek.

Ne’e duni, husu ba povu Timor tomak no atu foti medida ruma ba informasaun asaun terrorizmu ne’ebé espalla iha rede sosiál. Husu atu labele espekula tanba bele fó impaktu ba atividade ekonomia rai laran, nune’e mós relasaun nasaun rua ne’e bele fó influensia hodi bandu sidadaun sira atu vizita ba malu.

Lígia Noronha | Independente