Governu Sei Submete Programa ba PN Iha Semana Ne’e

DILI, (TATOLI) – Ministru Reforma Lejizlativa no Asuntu Parlamentár, Fidelis Leite Magalhães informa katak VIII Governu Konstitusionál semana ida ne’e nia laran sei aprezenta programa governu ba Parlamentu nasionál (PN) hodi diskute.

“Ami governu tenke lori mai, ba ita boot sira iha loron 30 nia laran, ne’ebé sei lori mai iha semana ida ne’e nia laran, tanba loron 22 monu iha Domingu,” Fidelis informa bainhira marka prezensa iha plenária, horisehik.

Nia reforsa governu sei kumpre devér hanesan konstituisaun haruka mezmu hasoru difikuldade oi tuan tanba estrutura governu seidauk kompletu.

“Ami sei kumpre ami nia devér hanesan konstituisaun haruka maibé ami iha preokupasaun ida katak governu ida ne’e hasoru difikuldade, karreta ida karik ho roda tolu tanba hanesan deputadu sira dehan katak ministru xave sira seidauk iha”, nia rekoñese.

Eis deputadu ne’e hatutan, kuandu ministru sira seidauk hetan pose mak membru governu seluk mós ezerse funsaun adisionais hodi tau matan ba ministériu sira ne’e.

Enkuantu hatán ba lista membru governu ne’ebé seidauk simu pose,  Nia dehan VIII Governu Konstitusionál nafatin mantein ho lista ne’ebé husi Primeiru-Ministru (PM), Taur Matan Ruak, aprezenta.

Husu públiku atu lalika preokupa ho kredibilidade tanba kandidatu hirak ne’e sei la redús kredibilidade. Sei ita preokupa ho kredibilidade, Primeiru-Ministru hatene katak kandidatu sira ne’ebé temi ona sei la redús kredibilidade.

Jornalista: Julia Chatarina | Editór: Manuel Pinto

Imajen: Ministru Reforma Lejislativa no Asiuntu Parlamentár, Fidelis Leite Magalhãeas. Imajen TATOLI/António Gonçalves