Parlamentu timoroan aprova debate urjénsia kona-ba diploma sira fronteira nian

Maioria hosi Governu iha parlamentu timoroan aprova ona, iha loron-segunda ne'e, debate urjénsia ida hosi konjuntu ida ba koresaun lejislativu sira ne'ebé presiza hodi halo ratifikasaun ba tratadu ho Austrália kona-ba fronteira permanente sira iha Tasi Timor.

Kalendáriu urjente aprova ona ho apoiu hosi maioria hasoru protestu hosi Frente Revolucionária do Timor-Leste Independente (Fretilin), ne'ebé kestiona rekursu urjénsia ba debate sira ne'e.

Duarte Nunes, xefe hosi bankada Congresso Nacional da Reconstrução Timorense (CNRT) nian, partidu boot hosi koligasaun Governu nian, defende ona urjénsia ne'e hodi fó tan tempu análize nian ba Prezidente no, hodi depois halo reavaliasaun iha kazu veto nian.

Nia hatete katak objetivu maka atu diploma sira ne'e bele aprova iha tempu nia laran hodi permiti ratifikasaun ba tratadu iha loron 30 Agosto, bainhira kumpri tinan 20 hosi referendu ne'ebé akontese bainhira ema timoroan sira hili independénsia.

"Bainhira ita husik tarde liu, bele laiha tempu", hatete hosi Duarte Nunes.

Aniceto Guterres Lopes, xefe bankada Fretilin nian, kestiona Governu no maioria kona-ba demora hodi hahú prosesu ratifikasaun ne'e, tanba tratadu asina ona iha fulan-Marsu 2018.

"Tratadu asina ona iha tinan ida resin liubá no programa loron 30 Agostu anunsia dezde fulan-Janeiru. Bainhira hakarak halo ratifikasaun ho aniversáriu loron 30 Agostu, tansá maka demora tebes", nia kestiona.

"Sira toba dezde fulan-Janeiru? Tansá maka agora ho karater urjénsia? Halo favor esklarese: toba dukur hela no derepente rona instrusaun sira no hakarak obriga aselera agora?", nia hatutan mós.

Lopes eziji ba Governu ho parlamentu kalendáriu extensu ida ba "konsulta ba entidade relevante sira no ba sosiedade ba mudansa sira ne'e", liuliu ba Lei hosi Fundu Petrolíferu no ba Lei Atividade Petrolíferu nian.

"Parlamentu tenki konsulta tribunal konta, Banku Sentral, konfisaun relijiozu sira, sosiedade sivil. Labele obriga vontade hosi Governu de'it", nia afirma.

Fernanda Lay hatete katak Governu ho negosiador prinsipal tratadu nian, Xanana Gusmão, esplika ona impaktu boot hosi tratadu no mudansa sira ne'ebé presiza hodi permiti ratifikasaun hosi dokumentu ne'e.

"Bainhira ita atraza sei sai demora atu Timor-Leste simu reseita sira ne'ebé sira deve", nia hatete.

Kalendáriu ne'ebé aprova iha loron-segunda ne'e haree atu iha loron-tersa iha audisaun hamutuk ida ho Governu hamutuk ho ekipa negosial tratadu timoroan nian.

Relatóriu ho opiniaun hosi komisaun sira sei aprezenta ho vota iha loron-kuarta dadeer no, iha parte loraik, hahú debate no karik aprovasaun iha jeneralidade.

Proposta sira fila fali ba komisaun sira ne'ebé sei halo debate sira entre loron 18 ho 22 Jullu, hodi haree ba iha loron 23 Jullu, ho votasaun final ho global previstu ba loron 24 Jullu.

Redasaun ikus hosi diploma sira sei hakotu iha loron 25 Jullu antes haruka, iha loron tuirmai, ba Prezidente Repúblika.

Iha kauza maka pakote ida hosi dekretu sira ho proposta lei ne'ebé presiza hodi ratifika "Tratadu entre Repúblika Demokrátika Timor-Leste nian ho Commonwealth Austrália ne'ebé estabelese Fronteira Tasi sira iha Tasi Timor, Akizisaun hosi Interese sira iha Kampu Petrolíferu sira ho Selebrasaun hosi Akordu sira relasionadu ho Dezenvolvimentu hosi Kampu sira Greater Sunrise nian”.

Lusa iha SAPO TL