Asosiasaun defeza ba direitu sira konsumidor nian repete fali, iha loron-kinta, nia preokupasaun ho kondisaun sira hosi servisu elétriku sira iha Timor-Leste no apela ona ba Governu atu bele foti medida importante sira hodi hadi'a fornesimentu.
"TANE Konsumidor eziji respeitu ba direitu sira hosi konsumidor sira ne'ebé maka konsagra iha lei, liuhosi definisaun hosi kuadru legal ida ne'ebé obriga Eletrisidade Timor-Leste (EDTL) ba informasaun antes ba konsumidor sira kona-ba kondisaun sira hosi servisu sira ho selebrasaun kontratu sira entre fornesedor sira servisu hosi enerjia elétrika nian no konsumidor sira", refere iha komunikadu ne'ebé haruka ba Lusa.
Organizasaun defende mós "implementasaun hosi medida importante sira hodi hadi'a kualidade hosi servisu báziku ne'e ho forma regular no ba estabelesimentu hosi tarifa justu sira".
Iha nota hanesan, TANE Konsumidor felisita aprovasaun hosi estatutu foun EDTL nian hanesan empreza públika, maibé konsidera katak sei presiza fó pasu sira hodi "garanti direitu sira hosi konsumidor sira" iha área ne'e.
"Eletrisidade hanesan servisu públiku importante ida ba efetivu asesu universal hosi konsumidor sira hotu. Iha Timor-Leste presiza mós asegura ba ema timoroan sira kontratasaun transparente ida ho kualidade hosi servisu ne'ebé fó", nia subliña.
TANE alerta ona, iha tinan ne'e, ba problema sira iha área elétriku, iha Marsu husu "seguransa iha distribuisaun hosi eletrisidade, salvaguarda integridade fíziku hosi konsumidor sira, durabilidade hosi nia ekipamentu sira ho funsionamentu di'ak hosi infraestrutura sira".
Maski iha di'ak maka'as iha fornesimentu iha nasaun tomak iha tinan hirak ikus ne'e, servisu elétriku iha Timor-Leste afetadu beibeik hosi instabilidade ho ko'a ne'ebé maka hamosu estraga maka'as ba ekipamentu sira ho lakon ba empreza sira ho sidadaun sira.
Kria ho apoiu hosi DECO - Asosiasaun Portugeza ba Defeza Konsumidor nian no hosi Uniaun Europeia, Asosiasaun Timoroan ba Defeza Konsumidor nian - TANE Konsumidor - dezenvolve nafatin asaun oioin iha área importante sira ekonomia nian, hanesan kazu hosi telekomunikasaun ka retallu sira.
Sapo TL | Lusa
Sem comentários:
Enviar um comentário