Kruz Joven ho Ilhas Nai Feto Vizita Atauro, Motael Oan Sira Tenki Hela Ho Paz

Sarani Paroquia Santo Antonio Motael, Diocese Dili, Tersa dader (30/6/2015), despede Kruz Joven ho Ilhas Nai Feto Peregrina, ne’ebe maka hi’it an ba vizita Sarani lubun bo’ot iha Ilha Atauro.

Iha serimoia despedida, Padre Paroquia Motael, Pe. David Alves da Conçeição, tatoli ba nia Sarani sira ne’ebe horik iha zona paroquial Motael nian, atu kontinua hametin valor Kiristianismu hodi hadomi malu no kria paz iha sosiedade nia laran.

Durante semana tomak, hahuu husi Kuarta-Tersa (24-30/6/2015), Kruz Joven ho Ilhas Nai Feto mai horik ho Sarani sira Paroquia Motael nian hodi hala’o mos vizita ba Sentro Pastoral lubun ida ne’ebe haman-an iha Paroquia Motael.

Maske Kruz Joven ho Ilhas Nai Feto la horik ona ho Sarani Motale sira, maibe nia esperito no beran kontinua hela ho Sarani sira iha vida moris lor-loron nian. Nune’e, Pe. David Alves da Conçeição, husu ba nia Sarani sira atu moris nafatin iha dame no domin nia laran.

Hafoin serimonia entrega Kruz Joven ho Ilhas Nai Feto Peregrina ba Sarani sira Atauro, Pe. Francisco Asisi, nudar bibi atan Atauro nian husu atu Sarani hotu la bele tauk hakur tasi hodi liu ba Atauro, tanba Nai Jesus Kristo ho Inan Santa sempre akompanha no fo kbi’it ba nia emar sira hodi bele la’o ho isin diak to’o Atauro.

Durante loron 6 no kalan 6 hamutuk ho Sarani Motael, la iha karan kmanek ne’ebe maka Sarani Motael tatoli tuir Kruz Joven ho Ilhas Nai Feto. Maibe, Sarani sira agradese boot tanba bele kria hikas paz ba Sarani Motael oan sira ne’ebe maka tinan barak haree malu matan la mos.

Hafoin lia nain Motael nian hasto’o tiha lia despede ba Kruz Joven ho ilhas Nai Feto, reprezentante joventude nain 5 ne’ebe reprezenta Sarani Motael entrega Likurai 5 ho lafatik 5 ne’ebe hakonu ho ai-han lokal entrega ba Lia nain Atauro, nudar bukae ida ba Sarani sira ne’ebe maka akompanha Kruz Joven ho Ilhas Nai Feto Peregrina ba Atauro.

Hananu, bidu no dahur, hafutar serimonia despedida Ilhas Nai Feto ho Kruz Joven, ne’ebe maka hakat husik dau-daun ona atan sira iha Paroquia Motael nia laran.

Inan feton nain 8 ho mane maluk nain 4 hakbas Ilhas Nai Feto ho Kruz Joven hodi entrega ba Sarani sira Atauro no husik mos manu falur ne’ebe reprezenta simbolu paz nian.

Grupu lubun boot, kompostu husi Acolitus, Cruzadas Eucaristico, representantes Crismando, madres, padres, leigus, grupo dansa tradisional, grupo dansa Santo Antonio, autoridade lokais no autoridades Konselhu suku sitra reza no hananu knananuk despedida nian hodi entrega Kruz Joven ho Ilhas Nai Feto ba Sarani Atauro oan sira.

Esmeralda da Costa, nudar Sarani Motael senti triste no laran susar, tanba tenke despede lalias deit Ilhas Nai Feto ho Kruz Joven, ne’ebe durante vizita sira nia Paroquia hatudu sinal grasa oi-oin ba Sarani sira Motael no kria hikas paz ba Sarani sira Motael nian iha zona pastoral hotu-hotu. ita

Jornal Nacional