AEROPORTU SUAI ATINJI 23% – WASKITA REKONHESE ATRAZU - video

Kompanhia kontraktor WASKITA Karya ne’ebe ezekuta mega projetu konstrusaun Aeroportu Suai rekonhese katak, obra ne’ebe sira kaer atrazu, tanba foin maka atinji 23%.

Diretur WASKITA, Sugiharto, hateten katak iha tempu badak nia laran, obra ne’e bele atinji ona 26%. Maske, WASKITA infrenta hela kauza hitu (7) ba harii edifisiu, hodi nune’e, foin kensege harii 3 tanba area balun seidauk livre.

Ba jornalista sira iha nia servisu fatin, Kampung Baru, Comoro, Kuarta (01/7/2015), klarifika katak, area sira ne’ebe maka seidauk livre ne’e tanba sei okupa husi komunidade sira.

“Komunidade sira hakarak uma ne’ebe Governu halo ne’e tenki hotu ona maka sira foin bele muda,” informa Sugiharto hodi hatutan mos katak, buat ne’ebe nia hatene, uma Governu prepara ne’e hotu ona iha Setembru ka Outubru, tinan kotuk, maibe la hatene razaun komunidade nian to’o agorta seidauk bele sai husi fatin sira ne’e.

Ho difikuldades hirak ne’e hotu, katak Sugiharto, sai problema ba WASKITA atu halao servisu dala ida deit. Nune’e, WASKITA tenki halo maneira posivel atu halo uluk area hirak ne’ebe maka livre ona.

“total area ne’ebe livre 50%, tanba ne’e komunidade sira hein hela uma ne’ebe maka Governu atu enrega ba sira hirak ne’ebe sei okupa area 50% seluk,” esplika Sugiharto.

Tuir kontratu ho Governu katak, konstrusaun Aeroportu Suai tenke finaliza ona iha Fevereiru 2016, maibe WASKITA seidauk bele rpomete atu remata tuir kontratu ka lae, tanba buat barak maka preseiza atu rezolve iha terenu.

Orsamentu ne’ebe maka Governu aloka ba obra ne’e hamutuk miloens 67 USD, ne’ebe WASKITA foin gasta 7%, hodi utiliza ba kompra material, selu trabalhadores ne’ebe maioria Timor oan ho internasional balun no uza ba nasesidades importante seluk tan.

Antes ne’e, Primeiru Vise Prezidenti Parlamentu Nasional, Adriano do Nascimento hatete, Governu gasta milloens 67 USD ba konstruksaun Aeroportu Suai, maibe to’o ohin loron laiha rezultadu at liu tan, Governu la tau matan ba konstruksaun ne’e.

Kona ba laiha kontrolu husi Ministeriu Obras Publiku Transporte no Comunicações (MOPTC), Jornalista JN-Diario tenta atu komfirma ho Ministru MOPTC, Gastão de Sousa, maibe Ministru okupadu ho servisu seluk. Nune’e, tenta atu halo klarifikasaun husi Vise Ministru MOPTC, Inacio Moreira, maibe vbise ministru halo hela vizita trabalhu ba estranjeirus. mia

Jornal Nacional