PD Prontu Lidera MEKAS-ME, FRETILIN-CNRT Sujere PM Hili Ema Kapasidade

Partidu Demokratiku (PD) preparadu atu asume hikas pasta Ministru Estadu Kordenador Asunto Sosiais e Ministru Edukasaun (MEKAS-ME) nebe saudozu Fernando La Sama de Araújo husik hela, maibe nomeasaun ba posizaun ne’e kompetensia Primeiru Ministru nian.

“Atu deside se mak ba ne’e kompetensia konstitusional Primeiru Ministru nian, ne’ebe Primeiru Ministru mak deside ita tenke lao tuir Konstituisaun. Agora partidu ne’e buat ketak ida, partidu hola desizaun ne’e sujestaun para Primeiru Minisru bele konsidera lista naran ne’ebe que partidu aprezenta ne’e hanesan proposta ida, agora ultima desizaun iha Primeiru Ministru tuir Konstituisaun,”afirma atual Prezidente interinu partidu PD, Adriano do Nascimento ba Jornalistas sira Kuarta (01/7) iha PN.

Adriano do Nascimento hatan konaba ninia naran mos tama iha lista nee nia hatan katak nee kompetensia Primeiru Ministru nian, labele obriga PM.

“Husik Primeiru Ministru hola desizaun, se por ezemplu Hau hatete kedas ona karik ne’e tama ona, entaun ita obriga ona PM ne’e labele” dehan Adriano.

Kuandu PM hili lider PD tuir lista ne’ebe mak partidu aprezenta ona ne’e, partidu sei kontinua programa no obra ne’ebe mak saudozu La Sama husik hela, maibe buat hotu depende ba dinamika iha ukun ninian, dinamika ministeriu ne’e nian e depende mos denamika nesesidade no moris povu nian.

“Em prinsipiu katak, obra ne’ebe que La Sama hela ba politika obra konkretu nia planu iha ne’eba ho mos ninia hanoin tomak ami hanesan kuadru partidu demokratiku nian ami komunga ho nia (La Sama-Red) nia hanoin tanba molok sai membru Governu ou sai Ministru buat ne’e ami koalia ona iha partidu Demokratiku nian katak, oinsa mak atu partidu demokratiku kontribui diak liu tan ba prosesu dezenvolvimentu,” dehan Vice Presidente Parlamento nasional nee.

Lista kandidatu ne’ebe mak partidu aprezenta ba PM kompostu husi, atual vice Prezidente Parlamentu Nasional, Adriano do Nascimento, Antonio da Conceção atual (Ministru Comersiu e Industria), Arcanjo Leite (eis Ministru ESTATAL), Alex ne’ebé mak durante ne’e akompaña saudozu La Sama nia servisu, Rui Hanjam (Eis vice Ministru Finansas), Marcelino Magno, João Rui Amaral ne’ebé mak uluk hanesan mós La Sama nia Xefe gabinete no João Boavida no mos eis Deputada Getrudes Moniz.

FRETILIN-CNRT Sujere PM Hili Ema Kapasidade

Konaba asume kargu refere bankada FRETILIN no bankada CNRT sujere atu PM hili ema ne’ebe mak iha kapasidade hodi lori instituisaun Estado ne’e.

“Governu hili ema ne’ebe mak diak troka saudozu La Sama para halo kontribuisaun ne’ebe diak liu, masimu liu iha Governasaun nia laran, atu bele halo dezenvolvimentu rai ida ne’e diak liu tan,”hateten deputadu Paul Moniz Maia husi bankada FRETILIN.

Deputadu Paul Moniz hatutan, atu deside se mak atu asume hikas kargu ne’e depende ba Primeiru Ministru (PM), Rui Maria de Araujo mak iha kompetensia.

“Hanesan atu troka MEKAS-ME ne’e depende PM, PM mak iha kompetensia para atu hili, Timor oan hotu-hotu iha kapasidade so que ema ida-idak nia kapasidade la hanesan, Hau la fiar katak saudozu La Sama mate tiha ema ida atu troka ne’e hanesan lolos ho nia (saudozu La Sama-Red) bele mos liu nia e bele mos la to’o nia,”dehan Paul Moniz.

Iha fatin hanesan deputadu Arao Noe de Jesus Amaral husi bankada Congresu Nasional Rekunstruksaun Timorense (CNRT) haktuir, PM persiza hili ema ne’ebe mak iha kapasidade.

“nomeasaun se-se deit importante Timor-oan ida ne’ebe iha kapasidade para atu kaer Ministeriu Estado Kordenador Asuntu Sosiais e Ministru Edukasaun” dehan Nia.

Nia haktuir, atu hili membru Governu ida ne’e kompetensia PM nian atu deside se mak bele asume kargu MEKAS-ME, tanba ne’e lista partidu PD nian ne’ebe mak aprezenta ona ba PM ne’e atu konsidera ka lae ne’e kompetensia PM nian. bal

Jornal Nacional