KP-CNRT LA FIAR XANANA ATU REZIGNA-AN – DIONISIO APELA LA BELE TAUK

Eis Sekretariu Estadu Defeza nune’e mos hanesan membru Klibur Profesional Partidu Congreso Nasional Rekonstrusaun Timorense (KP-CNRT), Julio Tomas Pinto, la fiar katak, lider karismatiku Kay Rala Xanana Gusmão, hanoin atu rezigna-an husi prezidenti partidu CNRT.

“Hau la fiar katak maun Xanana atu rejigna an husi parezidenti partidu CNRT. Ne’e inposivel, tanba partidu fo mandatu ba maun Xanana to’o kongresu. Ida maun bot rejigna husi ministru ne’e hau fiar,” hateten Julio Tomas Pinto hodi responde JN-Diario bainhira partisipa iha terseiru konferensia OJP-CNRT nian ne’ebe mak hala’o iha salaun CNE, Caicoli, Dili, Sabado (03/10/2015).

Membru KP-CNRT ne’e dehan katak nia rasik seidauk hatene atu eis Primeiru Ministru (PM) atual Ministro Planeamentu no Investimentu Estratejiku (MPIE) atu rejigna an.

“Hau mos rona rumoris deit, hau desde sai husi membru Governu nunka hasoru maun bot Xanana, mais husu hau nia oponiaun hakarak rejigna ka mantein ne’e konforme maun Xanana, tanba laiha justifisaun ida klean para Primeiru Ministro hasai nia, inportante ba ami mak ninia saude diak,” hateten Julio Tomas Pinto.

Iha fatin hanesan, Sekretario Jeral Partidu CNRT, Dionisio da Costa Soares Babo mos apela ba militantes partidu CNRT, liu husi terseiru konferensia OJP-CNRT nian katak, la bele hakfodak, tauk no la bele fiar rumoris ne’ebe mak dehan katak Prezidente partidu CNRT Xanana Gusmão atu rejigna an husi partidu.

“Ema balun koalia dehan katak Xanana sei sai husi partidu iha tempu besik mai, ne’e rumoris no bosok deit, tanba Xanana mak halo partidu, Xanana mak sei moris ho partidu sei mate no moris nafatin ho partidu CNRT, tanba ne’e maka hau husu ba joventude no militantes partidu CNRT nian lalika hakfodak no tauk, ita tenke hamutuk nafatin iha ambitu demokrasia ne’ebe mak iha ita nia rai. Agora iha partidu barak ne’e diak liu tan atu bele ajuda haburas liu tan demokrasia iha rai Timor nia laran,” apela Dionisio Babo.

Atual Ministro kordenador asuntu Justisa no Ministro Administrasaun Estatal ne’e dehan, rai Timor la’os ema ida nian, mais ema hotu nian, tanba ne’e mosu partidu barak iha eleisaun mai diak liu tan hodi nune’e bele dezenvolve Timor diak liu tan.

“Hau hakarak hateten katak, rai ida ne’e ita hadomi hotu, ita reklama ita nian mesak, mais ita hotu nian, tanba ne’e mak ita hotu hamutuk hodi fo forsa nafatin ita louva nafatin inisiativa ne’ebe atu hadomi demokrasia hodi buras iha ita nia rain,” hateten Dionisio Babo.

Durante tinan rua no tolu nia laran, katak Dionisio, ema koalia dehan, tanba sa mak CNRT manan tiha mais fo fali ba ema mak ukun, ema sira koalia hanesan ne’e tanba hanoin klot demais ka sira hanoin ba deit sira nia an. La hare ba interese nasional, husi uluk kedas partidu CNRT iha ninia objetivu 3 hanesan tenke iha unidade nasional, tenke iha estabilidade nasional no mos tenke iha dezenvolvimentu nasional. Mia

Jornal Nacional