PM RUI ARAÚJO: “ONU KONTRIBUI BA LIBERTASAUN TL”

Primeiru Ministru (PM), Rui Maria de Araújo hateten katak, Organizasaun Nasoens Unidas (ONU) fo kontribuisaun maka’as ba prosesu luta no libertasaun Timor-Leste (TL).

Tanba ne’e PM rui husu Timor oan tomak atu fo agradesimentu ba kontribuisaun ONU nian ba istoria libertasaun TL nian ne’e.

“Ha’u hakarak konvida ita Timor oan hotu atu fo agrdesimentu espesial ida ba ONU tanba Timor Leste nia istoria iha tinan 24 nia laran, ne’ebe ita luta ba libertasaun ita nia istoria mos kahur malu ho ONU nian,”esplika PM Rui liu husi nia diskursu ba selebrasaun loron aniversariu ONU ba tinan 70, Kinta (29/10), ne’ebe maka hala’o iha Salaun Canossa Comoro, Dili.

Maske nune’e, PM Rui dehan, ho aniversario ONU ba tinan 70 ne’e, ONU hatudu susesu lobuk ida, maibe mos hatudu frakasus.

PM Rui hatutan, iha tinan 1975 iha fulan Dezembro reprezentante Timor nian ida naran José Ramos Horta to’o iha ONU sei joven los, iha momentu ne’eba nia sei tinan 23. Ramos Horta ba ONU lori povu TL nia naran, lori diresaun da luta TL atu hato’o ba ONU katak, iha forsa estranjeirus Indonesia maka invade ona TL.

Entaun husi ne’e, nia dehan, TL iha movimentu maka’as ba libertasaun ida, hahú husi ne’eba iha tinan 24 nia laran Timor marka prezensa tinan-tinan iha ajenda ONU nian.

“Ita hotu sei hanoin katak, iha Setembro 1999 ONU foti desizaun iha tempu rekorde kona-ba situasaun iha TL, no Konselhu Seguransa hola desizaun atu intervein iha TL, liu loron lima forsa Internasional to’o iha TL, tanba ida ne’e ita TL tenki agradese no fo parabens ba ONU,”haktuir PM Rui.

La’os ida ne’e deit, maibe PM Rui dehan, iha tinan hira nia laran ONU akompanha TL iha periodu transizaun prepara Governasaun atu bainhira Timor restaura nia independensia bele ukun rasik nia a’an.

“Infelismente buat barak la la’o tuir ita nia hakarak, maibe ita tenki rekonhese katak, ONU halo buat ida iha kontekstu ida ne’eba, ONU sira mos akompanha ita iha misaun de paz nian, iha misaun ba paz ida ne’e, ONU nafatin akompanha ita hanesan país ne’ebe foin sai husi konflitu,”tenik PM Rui.

Nune’e mos Xefi Governu Rui dehan, TL mos partisipa iha simeira ka enkontru altu nivel ba Xefi Estado, Xefi Governu nian atu adopta objektivu dezenvolvimentu sustentabel. Ho razaun ne’e maka nia dehan, iha loron Kinta (29/10) hotu-hotu tu’ur iha salaun Canossa ne’e atu koalia kona-ba   oinsa iha loron aniversariu ONU ida ne’e, TL bele estabelese parseria diak ida ho joven sira atu bele dudu objektivu dezenvolvimentu sustentavel nian.

Nune’e mos Kordenador Rezidente Organizasaun Nasoens Unidas (ONU) iha Timor Leste, Knut Aostby hateten, ONU sei kontinua tau matan ba potensialidade TL.

“Ami sei kontinua apoiu inisiativa dezenvolvimentu nasional ne’ebe sei loke Timor oan nia potensialidade tebes”haktuir Knut Aostby.

Ne’e duni Knut Aostby dehan, ONU hein no atu kontinua reforsa relasaun ho TL iha eventu hotu no ONU sei dedika a’an nafatin apoia TL hodi bele atinji susesu ne’ebe bo’ot liu tan iha futuru.Avi

Jornal Nacional